2021 წლის რთველში, პრემიერ-მინისტრის ცოლისძმისა და კახეთის ყოფილი გუბერნატორის კომპანიებმა 800. 000 ლარზე მეტი თანხა მიიღეს
2021 წლის რთველში, პრემიერ-მინისტრის ცოლისძმისა და კახეთის ყოფილი გუბერნატორის კომპანიებმა 800. 000 ლარზე მეტი თანხა მიიღეს-“საერთაშორისო გამჭვირვალობა-საქართველო.“
არასამთავრობო ორგანიზაციამ რთველის პროცესში გახარჯული თანხების შესახებ, ანგარიში გამოაქვეყნა, სადაც წერია, რომ ირაკლი ღარიბაშვილთან დაკავშირებულმა კომპანიებმა მისი ცოლისძმის, ალექსანდრე თამაზაშვილის შპს „ვაინ კახეთმა“, პარლამენტის უმრავლესობის ყოფილი წევრის, კახეთის ყოფილი გუბერნატორის ირაკლი შიოლაშვილის ღვინის მარანმა, შპს „ქინძმარაულმა“ და ყოფილი შსს მინისტრის, ალექსანდრე ჭიკაიძის კომპანიამ – შპს „რთველისმა“,
გამარტივებული შესყიდვებით ისარგებლეს და ჯამურად 800,000 ლარზე მეტი ოდენობის თანხა მიიღეს.
საერთაშორისო გამჭვირვალობა-საქართველოს“ ინფორმაციით, რთველის სუბსიდირების პროცესში, მთელი რიგი კორუფციული ტიპის პრობლემები იკვეთება, მათ შორის უპირატესობა ენიჭება მმართველი პარტიის შემწირველ და მაღალი თანამდებობის პირებთან კავშირში მყოფ კომპანიებს.
ანგარიშში ნათქვამია, რომ 2021 წელს მთავრობამ რთველზე ჯამში 138 მილიონი ლარის სუბსიდია, პირდაპირ ბიუჯეტიდან და ღვინის სააგენტოს გავლითაც გასცა.
სუბსიდიის ძირითადი თანხა სახელმწიფოს კუთვნილ შპს „მოსავლის მართვის კომპანიაში” ჩაირიცხა. 2021 წელს ამ თანხამ ჯამში თითქმის 107 მილიონ ლარზე მეტი შეადგინა: “მოსავლის მართვის კომპანიამ” პირდაპირ ბიუჯეტიდან 86,500,000 ლარი მიიღო, ხოლო დამატებით 20,872,727 ლარი მას ღვინის სააგენტომ მისცა.
ღვინის სააგენტოსგან მიღებული თანხით კომპანიას როგორც საღი, ისე სეტყვით დაზიანებული ყურძენი უნდა ჩაებარებინა, ხოლო 86,500,000 ლარით მიღებული მოსავალი გადამუშავებინა, დაესაწყობებინა და ტრასპორტირება მოეხდინა, აგრეთვე გაესტუმრებინა სასესხო საკრედიტო ვალდებულებები.
ღვინის სააგენტომ რთველის დაფინანსებაზე ჯამურად 47,447,110 ლარი გასცა. აქედან, 20,872,727 ლარი “მოსავლის მართვის კომპანიის”, ხოლო დანარჩენი – 26,547,383 ლარი – 82 ღვინის მარნის სუბსიდიაზე დაიხარჯა
მთავრობის 2021 წლის 23 აპრილის #626 განკარგულების თანახმად, შპს „მოსავლის მართვის კომპანიას” დაევალა ყურძნის მიმღები პუნქტების აღჭურვა შაქრის ავტომატური მზომი მოწყობილობებით და ამისთვის, სახელმწიფო ბიუჯეტიდან დამატებით 3,500,000 ლარი ჩაერიცხა.
ღვინის სააგენტოში, წინასწარ სულ 83 ღვინის კომპანია დარეგისტრირდა, საიდანაც 31 “‘ქართული ოცნების” მოქმედ ან ყოფილ წევრებს ეკუთვნის, ან დაკავშირებულია მათთან და მათ ოჯახებთან.
31 კომპანიაზე 30,343,512 ლარის ოდენობის თანხა გაიცა, რაც სუბსიდიის საერთო მოცულობის 22%-ს შეადგენს.
კვლევის შედეგად გამოიკვეთა, რომ სუბსიდიის მიმღები კომპანიები ასევე იღებენ გრანტებს სახელმწიფო პროგრამიდან „აწარმოე საქართველოში”, სარგებლობენ შეღავათიანი, ფაქტობრივად, უპროცენტო აგროსესხებით და ამავდროულად, პარტია “ქართული ოცნების” შემწირველები არიან.
მმართველი პარტიის სასარგებლოდ 2016-2021 წლების განმავლობაში მათ 3,626,420 ლარი გაიღეს.
“საერთაშორისო გამჭვირვალობა-საქართველოს ” ანგარიშში ასევე მითითებულია, რომ “900,000 ლარის ღირებულების გამარტივებული შესყიდვა მიიღო 9 დღის დაარსებულმა კომპანიამ, შპს “დი ჯი ელმა”, რომლის მესაკუთრე თამარ ალუღიშვილი დედოფლისწყაროელი ბიზნესმენის, ნუგზარ ალუღიშვილის ქალიშვილია.
მედიაში გავრცელებული ინფორმაციით, კი, ნუგზარ ალუღიშვილი ირაკლი ღარიბაშვილის ოჯახის ახლო გარემოცვის წევრი და მისი ბიზნესის ფაქტობრივი განმკარგველია.
სუბსიდიის მიმღები 5 მსხვილი კომპანია დაკავშირებულია კომპანია „ბოლერო ენდ კომპანისთან”, რომლის ხელმძღვანელი ვახტანგ კარიჭაშვილია.
ჯამურად ამ კომპანიებმა მიიღეს 6 მილიონ ლარზე მეტი თანხა. ვახტანგ კარიჭაშვილი, მედიაში გავრცელებული ინფორმაციით, ბიძინა ივანიშვილის დეიდაშვილის, უჩა მამაცაშვილის ბიზნეს-პარტნიორია და მასთან ერთად ფლობს კომპანიას ბრიტანეთში.
ჯამურად, 2 მილიონ ლარზე მეტი მიიღო სააქციო საზოგადოება „კოტეხი-გურჯაანის ღვინის ქარხანამ“ და შპს “დუგლაძეების ღვინის კომპანიამ”. ეს კომპანიები უკავშირდება ზაალ დუგლაძეს, საქართველოს პარლამენტის წევრს “ქართული ოცნებიდან”.
არასამთავრობო ორგანიზაცია აღნიშნავს, რომ ქარხნებს, ყურძნის ჩაბარებისათვის ხელოვნური ბარიერები უწესდებოდათ.
“აღსანიშნავია ის ფაქტი, რომ ღვინის კომპანიას იმ შემთხვევაში შეეძლო სუბსიდიის პროგრამაში მონაწილეობა, თუ მევენახისგან 1000 ტონაზე მეტ ყურძენს ჩაიბარებდა. ამ ხელოვნური ბარიერის გამო, მცირე მარნებმა სუბსიდიით ვერ ისარგებლეს” – ნათქვამია ინფორმაციაში.
ორგანიზაცია სახელმწიფო უსაფრთხოების სამსახურის ანტიკორუფციულ დეპარტამენტს, შპს “მოსავლის მართვის კომპანიის” მიერ გამოცხადებული გამარტივებული ტენდერებისა და ყურძენში შაქრის მზომი მოწყობილობების შესყიდვის გამჭვირვალობის საკითხის შესწავლის რეკომენდაციით მიმართავს.
