კახეთში ინფიცირებულების 15-20 პროცენტი ბავშვია
კახეთში ინფიცირებულების 15-20 პროცენტი ბავშვია-ამის შესახებ, რადიო ჰერეთს, დაავადებათა კონტროლის ცენტრის კახეთის განყოფილების ხელმძღვანელმა განუცხადა.
ნელი ხიზანიშვილის განმარტებით, ბავშვების ინფიცირების მაჩვენებელი მაღალია.
” ეს არ არის დაბალი მაჩვენებელი, ტესტირების ცენტრებშიც მიმართვიანობა გაზრდილია. რეგიონში ომიკრონიც უკვე დაფიქსირებულია. ინფიცირების ყველაზე მაღალი მაჩვენებელი თელავშია და მას სხვა მუნიციპლიტეტები მოჰყვება”– განაცხადა ხიზანიშვილმა.
თელავის ბავშვთა საავადმყოფოს დირექტორი, თამილა თეიმურაზიშვილი ადასტურებს, რომ ბოლო დღეების განმავლობაში ბავშვთა მიმართვიანობა გაზრდილია.
” ბოლო დღეებში მომართვიქნობა გაიზარდა , ერთ დღეს, 12 შემთხვევაც დადასტურდა. ჩვენს გარდა, ტესტირების ცენტრებსაც ხომ აკითხავენ. შტამს აქ ვერ ვიკვლევთ, მაგრამ ალბათ ანაცვლებს ომიკრონი უკვე, რადგან უმთავრესად, ცხვირიდან ჩამონადენითა და ოდნავი ყელის ტკივილით ვლინდება”-განაცხადა თეიმურაზიშვილმა.
ინფიცირებული ბავშვები, საჭიროების შემთხვევაში, კახეთიდან თბილისის სხვადასხვა კლინიკებში, რეანომობილით გადაჰყავთ, რადგან კოვიდინფიცირებული ბავშვების სამკურნალო სტაციონარი, რეგიონში არ არის.
