მამუკა მდინარაძე მზია ამაღლობელს ჭამას სთავაზობს

კარგად თუ უნდათ რომ იყოს, შიმშილისა და სიკვდილისკენ კი ნუ მოუწოდებენ, მოუწოდონ, რომ საკუთარ თავსა და ჯანმრთელობას მიხედოს, – ამის შესახებ საპარლამენტო უმრავლესობის ლიდერმა, მამუკა მდინარაძემ ჟურნალისტებს „ბათუმელების“ დამფუძნებელ, მზია ამაღლობელთან დაკავშირებით განუცხადა.

მისივე თქმით, შიმშილობის გამო გათავისუფლებული ადამიანი არის სახელმწიფოსთვის დიდი ზიანის მომტანი.

„ჩვენ ისე წარმოგვიჩენენ, თითქოს, დიდი გმირობის ჩამდენი ადამიანი იყოს. გასაგებია, შიმშილობა და ჯანმრთელობის მდგომარეობა, რომელიც უნდა იყოს კარგი… ჭამა უნდა დაიწყოს და დამთავრდება ყველაფერი.

სახელმწიფოს დაშანტაჟების შემთხვევაში, არცერთი სახელმწიფო ამ შანტაჟს არ ექვემდებარება. ეს ჩვეულებრივი ამბავია. ეს არის მსოფლიო ცივილიზებულ სამყაროში მიღებული წესი, რომ შანტაჟს სახელმწიფო არ და ვერ დაექვემდებარება. კარგად თუ უნდათ რომ იყოს, შიმშილისა და სიკვდილისკენ კი ნუ მოუწოდებენ, მოუწოდონ, რომ საკუთარ თავსა და ჯანმრთელობას მიხედოს.

შიმშილობის გამო გათავისუფლებული ადამიანი არის სახელმწიფოსთვის დიდი ზიანის მომტანი. გმირად წარმოაჩენენ ადამიანს, რომლის სიკვდილი უნდათ. გადაჭარბების გარეშე, სალომე ზურაბიშვილმა ცოტა რბილად თქვა და მერე დეპუტატებმა, ჩვენმა კოლეგებმა დააკონკრეტეს, რომ მზია ამაღლობელი არის მათ ხელში საგანი, ინსტრუმენტი. მათ თქვეს, ჩვენ კი არ ვამბობთ. დღევანდელობის პარადოქსია ის, რომ ათი „ნაციდან“ 9 მის სიკვდილზე ფიქრობს და ოცნებობს. სუბიექტურად, ძალიან ბოროტებიც რომ ვიყოთ, არცერთ ჩვენგანს არ უნდა რაიმე ფატალური განვითარება ამ კონკრეტული „ქეისის“, მაგრამ გმირად ნუ გამოვიყვანთ ქალბატონს, რომელიც კონკრეტული დავალებით მოქმედებდა. ეს უნდა ვიცოდეთ ყველამ. ჯერ “სტიკერი” დააკრა პოლიციელს – ამ დავალების შინაარსი და შედეგი უნდა იყოს ის, რომ რაც შეიძლება რეპუტაცია შეელახოს სახელმწიფო ინსტიტუტებს, პოლიციას. პოლიციის უფროსთან მივიდა 1 თუ 2 საათის გამოშვებული მზია ამაღლობელი და ჯერ ქურთუკით დააკავა, რომ კარგად შემოერტყა და შემდეგ შემოარტყა. პოლიციელს გაარტყა სილა, დემონსტრაციულად, კამერების თანდასწრებით. ეს გააკეთა ერთადერთი მიზნით, რომ შეილახოს პოლიციისა და პოლიციელის რეპუტაცია. სპეციალურად ამიტომ დაარტყა პოლიციის უფროსს ხელი და ამოარჩია ეს ადამიანი. ეს არის ტრენინგებზე ნასწავლი ამბავი. ამას ტრენინგებზე ასწავლიან, რომ მაღალჩინოსანს, მის ხელქვეითებთან, მის დაქვემდებარებულ ადამიანებთან, გმირ პოლიციელებთან შეელახოს რეპუტაცია და ასე ჩამოშალონ სახელმწიფო. უშალოდ ამ სიბინძურის ამსრულებელი, იმ კონკრეტულ შემთხვევაში გახლდათ მზია ამაღლობელი. ახლა შიმშილობა რომ უნდა დააძალონ „ნაცებმა“, იქნებ მოკვდეს რამენაირადო და გამოვიყენოთ ეს ამბავიო, ეს მათი გეგმის ნაწილია. უნდა განვასხვაოთ გმირი და გარე დავალების შემსრულებელი ერთმანეთისგან. თუ მზია ამაღლობელი ამას დავალებით არ ასრულებდა და ვიღაცამ წააქეზა, აზრზე არ იყო რას კადრულობდა, მაშინ წარმოდგენა არ ჰქონია არც ჟურნალისტიკაზე, არც ქვეყანაზე. ორი ვარიანტია: ან განზრახ მოქმედებდა, უშუალო დავალებით, ან უბრალოდ ისე წააქეზეს ვიღაცებმა და შეაგდეს ამ როლის შესასრულებლად, ვერც აცნობიერებდა რას აკეთებდა. ეს ხომ წარმოუდგენელი ამბავია?! ერთიც და მეორეც მავნებლობაა.

რაც შეეხება ადამიანის ჯანმრთელობას, კიდევ უფრო მავნებლები და მეტი დამნაშავეები შეიძლება იყვნენ, იხდიდნენ სასჯელს, ნებისმიერმა მათგანმა შიმშილობა რომ დაიწყოს, სახელმწიფო ამას სამწუხაროდ ვერ დაექვემდებარება. სახელმწიფოს ჩამოშლისთვის აუცილებელ პირობებს დაგიდებენ ხელისგულზე, პოლიციის უფროსებს სილას გააწნავენ, მერე იშიმშილებენ და თურმე უნდა გამოუშვან“, – განაცხადა მამუკა მდინარაძემ.

ამასთან, როგორც მდინარაძემ აღნიშნა, მიუხედავად გადაცდომის ფაქტებისა, ქართველი პოლიციელები ფრანგ, გერმანელ პოლიციელებზე მეტად ჰუმანურად მოქმედებენ.

„როგორც კი ქართველი პოლიციელის მიერ ძალის გამოყენება გადასცდება ევროპელი პოლიციელის ძალის გამოყენების ზღვრებს, პირველები ვიქნებით ვინც ამაზე ქართულ პოლიციას ვუსაყვედურებთ. იმიტომ, რომ ქართველი პოლიციელები მოქმედებენ უფრო ჰუმანურად. შედარებითია ყველაფერი – ყოველთვის არის რაღაც გამოვარდნები ამ მასშტაბის ღონისძიებების დროს. როგორც კი მიუახლოვდება გერმანელი, ფრანგი, ამერიკელი პოლიციელების უხეშობის დონეს, პირველები ვიქნებით, საყვედურს რომ ვიტყვით. მიუახლოვდება, არათუ გადასცდება. ყოველთვის არის უხეშობის რაღაც პრეცედენტები, ამათ უნდათ რომ ეს სახელმწიფოს დაზიანების, ინსტიტუტების ჩამოქცევის მცდელობა გადაფარონ რომელიღაცა პოლიციელმა ვიღაცაზე რომ იუხეშა… მთავარია ყველა იყოს ჯანმრთელად, საბოლოო ჯამში, ეს სპეციალური ღონისძიებები დამთავრდეს ხოლმე ისე, რომ ვიღაცის ჯანმრთელობა არ დაზიანდეს. გახარია როგორც თხრიდა ვიღაცებს თვალებს და შემდეგ ჩვენ გვიწევდა მისი დაცვა… თვალების დათხრა ლეგიტიმური იყოო არავის გვითქვამს, მაგრამ ლეგიტიმური იყო მოგერიება. წინა ხელისუფლების წარმომადგენლები კლავდნენ ადამიანებს, რომლებიც არ ძალადობდნენ, იდგნენ მშვიდობიანად და [გვამებს] სახურავებზე აწყობდნენ. ამის ავტორი ხალხი ვიღაცას ვიღაცამ სადღაც მიარტყა, რა საზიზღრობააო ამას ამბობენ. მიარტყა ცუდია, მაგრამ ასიათასჯერ დაბალი ხარისხის დარღვევაა, ვიდრე მათ მიერ ჩადენილი ნებისმიერი ქმედება, მათი მმართველობის დროს. ახლა მკვლელი „ნაცები“ გვამუნათებენ ძალის გამოყენებაზე, ის ხალხი, რომელიც თვითონ კლავდა. ამიტომ ვერ მივიღებთ მათგან შენიშვნას,“ – განაცხადა მამუკა მდინარაძემ.
მზია ამაღლობელი 23-ე დღეა ციხეში შიმშილობს.

დღეს, 3 თებერვალს, მზია ამაღლობელი საპატიმროში მოინახულა მისი ინტერესების დამცველი ორგანიზაციის, “ახალგაზრდა იურისტთა ასოციაციის” ხელმძღვანელმა ნონა ქურდოვანიძემ. მისი თქმით, ამაღლობელი, რომელიც 23-ე დღეა შიმშილობს, მხოლოდ წყალს იღებს, რაც გავლენას ახდენს მის ჯანმრთელობაზე, თუმცა არ აპირებს შიმშილობის შეწყვეტას.

“ის შედარებით უფრო სუსტად გრძნობს თავს, ვიდრე მანამდე გრძნობდა, როდესაც მე მას ბოლოს შევხდი. თუმცა ის შიმშილობის შეწყვეტას არ აპირებს. მზია ამბობს, რომ ის ამას კიდევ გაუძლებს და პროცესში მიიღებს მონაწილეობას, რომელიც მარტშია ჩანიშნული. ის ასევე უარყოფითად და ემოციურად აფასებს იმ განცხადებებსაც, რომელიც „ქართული ოცნების“ სხვადასხვა წარმომადგენლის მხრიდან კეთდება. კერძოდ, როდესაც ისინი საუბრობენ იმაზე, თითქოს ეს არის შანტაჟი მზიას მხრიდან. მზია ამაღლობელს თავიდანვე ცხადად ჰქონდა ნათქვამი, რომ ის არ ითხოვს შიმშილობის გამო რაიმე შეღავათებს მის საქმესთან დაკავშირებით. ეს არის მისი გადაწყვეტილება იმ უსამართლობის გამო, რომელიც ქვეყანაში ხდება – არა მარტო მის საქმეზე, არამედ ზოგადად. აქედან გამომდინარე, ის პროტესტის ამ ფორმას აგრძელებს”, – უთხრა ჟურნალისტებს ნონა ქურდოვანიძემ.

“ახალგაზრდა იურისტთა ასოციაციამ” სახალხო დამცველს მიმართა, ამაღლობელის ჯანმრთელობის მდგომარეობის მონიტორინგისთვის შექმნას სპეციალური ჯგუფი. ასევე ითხოვენ რამდენიმე გამოკვლევის ჩატარებას.
საიამ მზია ამაღლობელის სამედიცინო დოკუმენტაცია მისი დაკავების შემდეგ პირველად 31 იანვარს მიიღო. ამაღლობელი 12 იანვარს დააკავეს და ის რუსთავის საპატიმრო დაწესებულებაშია განთავსებული.

საია სახალხო დამცველს სთავაზობს იმ ექიმების სიის მიწოდებასაც, რომლებიც მზად არიან, ჩაერთონ მონიტორინგის პროცესში.

მზია ამაღლობელი, რომელსაც 4-დან 7 წლამდე პატიმრობა ემუქრება პოლიციელისათვის სილის გაწვნის გამო, უკანონო პატიმრად მიიჩნევა უფლებადამცველი ორგანიზაციებისა და კოლეგების შეფასებით.

ის ჯერ ადმინისტრაციული წესით დააკავეს 11 იანვარს, შემდეგ კი გამოუშვეს და რამდენიმე საათში, – უკვე 12 იანვარს, – ხელახლა დააკავეს, ამჯერად სისხლის სამართლის წესით.

„მედიის თავისუფლების კოალიციის“ (MFC) წევრი 14 ქვეყნის საელჩოებმა 30 იანვარს გამოქვეყნებული ერთობლივი განცხადებით მოითხოვეს მზია ამაღლობელის გათავისუფლება.

ამ ქვეყნების მთავრობების გარდა, საერთაშორისო და ადგილობრივი უფლებადამცველი ორგანიზაციები, მრავალი უცხოელი და ქართველი პოლიტიკოსი, 300-ზე მეტი ქართველი ჟურნალისტი და რედაქტორი მოუწოდებენ „ქართული ოცნების“ ხელისუფლებას, მზია ამაღლობელი გათავისუფლდეს პატიმრობიდან.

29 იანვარს ხელისუფლებას ამაღლობელის გათავისუფლებისკენ მოუწოდა მედიის თავისუფლების საკითხებში ეუთოს სპეციალურმა წარმომადგენელმა იან ბრაათუმ.

30 იანვარს ევროპის საბჭოს ადამიანის უფლებათა კომისარმა მაიკლ ო’ფლაერტიმ რადიო თავისუფლებასთან ინტერვიუში განაცხადა, რომ შეშფოთებულია ამაღლობელის დაპატიმრებით და იმედოვნებს, ხელისუფლება სწრაფად იმოქმედებს.