მეშახტეები ხელფასის დაუყოვნებლივ მომატებას ითხოვენ
![](https://heretifm.com/wp-content/uploads/2016/02/aqcia-tyibulshi.jpg)
ტყიბულში პროტესტი გრძელდება. გაფიცული მეშახტეების საპროტესტო აქცია 13 დღეა გრძელდება.
ისინი ხელფასის 40 პროცენტიან მატებას, სამუშაო და უსაფრთხოების პირობების გაუმჯობესებას ითხოვენ. ტყიბულში წუხანდელი დაძაბული ღამის შემდეგ სტაბილური ვითარებაა. თუმცა, მაღაროელები კომპრომისზე წასვლას არ აპირებენ. მეშახტეები წუხელ საქნახშირის ადმინისტრაციის შენობაში შეიჭრნენ. ადმინისტრაციაში კი მომხდარი ფაქტი კერძო საკუთრების ხელყოფად შეაფასეს.
მოუსმინეთ აქციის მონაწილეებს: თემურ ხაჭაპურიძეს და ვახო ხურციკიძეს
ტყიბულში განვითარებული მოვლენების შესახებ, ინფორმაცია გაავრცელა შინაგან საქმეთა სამინისტრომ:
“ტყიბულის რაიონულ პოლიციაში შევიდა შეტყობინება, რომ შახტის ადმინისტრაციის წინ შეკრებილმა მოქალაქეებმა, რომელთა ნაწილიც ალკოჰოლური ზემოქმედების ქვეშ იმყოფებოდა, დააზიანეს შენობის ფანჯრები და ადმინისტრაციის შენობაში შეიჭრნენ.
საზოგადოებრივი წესრიგის უზრუნველყოფის მიზნით, ადგილზე იმყოფებიან ტყიბულის პოლიციის რაიონული სამმართველოს თანამშრომლები. ამ დროისთვის სიტუაცია კონტროლს ექვემდებარება.” – ნათქვამია უწყების მიერ გავრცელებულ განცხადებაში.
განცხადება გაავრცელა “საქნახშირი ჯი-აი-ჯი ჯგუფმაც”:
“მოხდა კერძო საკუთრების ვანდალური დარბევა და ხელყოფა. „საქნახშირი ჯი-აი-ჯი ჯგუფი” მოუწოდებს ყველას დარჩეს კანონის ფარგლებში და მიმართავს სამართალდამცველებს მოახდინონ დროული და შესაბამისი რეაგირება.
“ჯი-აი-ჯი ჯგუფი” მიმართავს ყველა კანონიერ ზომას, რათა დაცული იყოს წესრიგი, კერძო საკუთრების უფლებები და დაისაჯონ დამნაშავეები.” – ნათქვამია განცხადებაში.
პრეზიდენტის ადმინისტრაცია ტყიბულში განვითარებულ პროცესებს შეისწავლის
საქართველოს პრეზიდენტის ადმინისტრაცია ტყიბულში განვითარებულ პროცესებს დეტალურად შეისწავლის, – ამის შესახებ ცნობას თავად ადმინისტრაცია ავრცელებს.
მათი განმარტებით, ტყიბულში მიმდინარე მოვლენებთან დაკავშირებით პრეზიდენტის ადმინისტრაციის უფროსი გიორგი აბაშიშვილი ტყიბულის მაჟორიტარ დეპუტატს ელისო ჩაფიძეს ესაუბრა.
“დღეს ადგილზე ვითარების გასაცნობად პრეზიდენტის მრჩეველი კახა კოჟორიძე ტყიბულში ჩავა და პროცესში მონაწილე ყველა მხარესთან შეხვედრას გამართავს”, – განაცხადეს პრეზიდენტის ადმინისტრაციაში.