მკვლელობა ფონიჭალაში და ვარკეთილში

გვიანობამდე მუშაობდნენ სამართალდამცველები ფონიჭალაში მდებარე ავტო სახელოსნოში, სადაც მკვლელობა მოხდა.

კრიმინალისტებმა დაათვალიერეს დაღუპულთა ავტომობილი, რომელიც შემდეგ დაცულ ავტოსადგომზე გადაიყვანეს. გვიან ღამით დასრულდა ფონიჭალის პოლიციაში იმ პირთა დაკითხვაც, რომლებიც შემთხვევას შეესწრნენ. დაკითხვაზე იმყოფებოდნენ მოკლულთა ნათესავები და ოჯახის წევრებიც.

დაკითხვიდან გამოსულები ამბობენ, რომ ორივე დაღუპული რუსეთში ცხოვრობდა და საქართველოში რამდენიმე დღით ჩამოვიდნენ, მათთვის მომხდარის მიზეზი გაუგებარია. გამოძიება დამამძიმებელ გარემოებებში განზრახ მკვლელობის მუხლით მიმდინარეობს.

სტაბილურია ფონიჭალაში თავდასხმის შედეგად ავტო სახელოსნოში მომუშავე დაჭრილი მამაკაცის ჯანმრთელობის მდგომარეობა. ის ნიუ ჰოსპიტალშია მოთავსებული. ექიმების თქმით, 47 წლის მამაკაცს დაზიანებები გულმკერდის არეში აღენიშნება და მის სიცოცხლეს საფრთხე ამ ეტაპზე არ ემუქრება. დაჭრილი რეანიმაციულ განყოფილებაში რჩება. მწვანე ფერის ოპელიდან ცეცხლი უცნობმა პირებმა ავტო სახელოსნოში მყოფებს გუშინ გაუხსნეს. 40 წლამდე ორი მამაკაცი ადგილზე დაიღუპა, ერთი დაიჭრა.

კიდევ ერთი მკვლელობა თბილისში. ვარკეთილში მამაკაცმა ცოლს ყელი გამოჭრა. არსებული ინფორმაციით, შემთხვევა დევნილთა დასახლებაში მოხდა.  როგორც მეზობლები ამბობენ, ამ დროს სახლში იმყოფებოდა სამი ბავშვი, მათ შორის ყველაზე პატარა  – 2 წლის. მათივე თქმით, ოჯახში კონფლიქტი ხშირად ხდებოდა. მომხდარზე დაწყებულია გამოძიება 108-ე მუხლით, რაც განზრახ მკვლელობას გულისხმობს. შინაგან საქმეთა სამინისტროში აცხადებენ, რომ დაკავებულია ერთი პირი. 

მსგავსი პოსტები

Back to top button