ოცნების “საყოველთაო სახალხო შეკრებაზე” ბიძინა ივანიშვილი მივიდა

პარლამენტთან “ქართული ოცნების” მიერ ორგანიზებული საყოველთაო-სახალხო შეკრება მიმდინარეობს. ღონისძიება საქართველოს ჰიმნით გაიხსნა. შეკრების სლოგანია “მამული, ენა სარწმუნოება”.

პარლამენტთან “ქართული ოცნების” საპატიო თავმჯდომარე ბიძინა ივანიშვილი და პარტიის სხვა ლიდერები მივიდნენ. ადგილზე იმყოფებიან ირაკლი კობახიძე, შალვა პაპუაშვილი, ირაკლი ღარიბაშვილი, მამუკა მდინარაძე, კახა კალაძე.

ყველა კუთხის, სოფლის, ქალაქის ბევრი წარმომადგენელი არის აქ და ეუბნება მსოფლიოს, რომ ჩვენ ვართ ყველაზე ამაყი, დამოუკიდებელი, სუვერენული ერი, – ამის შესახებ საპარლამენტო უმრავლესობის ლიდერმა, მამუკა მდინარაძემ საყოველთაო-სახალხო შეკრებაზე სიტყვით გამოსვლისას განაცხადა.
მდინარაძის თქმით, ყველა ერთად შექმნის ღირსეულ მომავალს.
„მივესალმები ჩვენს ამაყ ქვეყანას. მივესალმები საქართველოს ღირსეულ, პატრიოტი ხალხით, სიამაყით სავსე საქართველოს. ჩვენ, ყველანი ერთად შევქმნით ღირსეულ მომავალს, ისეთს, როგორსაც ამაყი ქართველი ერი იმსახურებს. დღეს აქ შევიკრიბეთ, რათა ვუთხრათ არა მხოლოდ ჩვენი ქვეყნის თითოეულ მოქალაქეს, არამედ მთელ მსოფლიოს, რომ არ არსებობს მსოფლიოში იმაზე ამაყი, თავდაჯერებული, ღირსეული ერი, როგორიც არის ქართველი ერი. ქართველები, რომლებიც ვერასდროს წარმოვიდგენთ ჩვენს თავს ჩვენი აფხაზი და ოსი თანამოძმეების გარეშე, რომელიც ორიენტირებული ვიქნებით ყოველთვის, რომ რაც შეიძლება მალე ჩვენ ვიცხოვროთ ერთიან საქართველოში, ერთიან, ძლიერ, თავისუფალ, სრულად დამოუკიდებელ საქართველოში. მინდა, მივესალმო ჩვენს ქართველებთან ერთად, ყველა ჩვენს ეთნიკურ ჯგუფს, ყველას, აფხაზებს და ოსებს, აზერბაიჯანელებს, სომხებს და ყველას, ვინც კი ამ ქვეყნის მოქალაქეა და ვინც ქართველია, რადგან არსებობენ ქართველი სომხები, ქართველი აზერბაიჯანელები, ჩვენ, ყველანი ერთად ქართველებად ვიწოდებით. ჩვენი საერთო მრწამსი მდგომარეობს იმაში, რომ დიდი ილიას სიტყვებს მივყვებით – მამული, ენა, სარწმუნოება. ჩვენ ყველამ ვიცით, რომ ჩვენი გზა არის ევროპაში. ჩვენი ადგილი არის ევროპაში, ჩვენ უნდა გავხდეთ აუცილებლად ევროპის ოჯახის სრულფასოვანი წევრები. ამასთან ერთად, უნდა ვთქვათ, რომ ევროპა ქართველებთან ერთად უფრო გამდიდრდება, უფრო ღირსეული, უფრო თამამი, ამაყი იქნება, რადგან ჩვენ შევავსებთ ევროპას, ჩვენ, ჩვენი კულტურით, იდენტობით კიდევ უფრო გავამდიდრებთ ევროპას. ჩვენი სვლა არ არის მარტივი. ყველამ ძალიან კარგად იცით, რომ ბევრი ამოცანა გვაქვს წინ, ბევრი ამოცანა აქვს „ქართულ ოცნებას“, ბევრი ამოცანა აქვს მას თავის ლიდერებთან ერთად, თავის საპატიო თავმჯდომარესთან, ბატონ ბიძინა ივანიშვილთან ერთად. ეს არის სვლა დეოკუპაციისკენ, სვლა ეკონომიკური განვითარებისაკენ, ევროპული ოჯახის სრულფასოვანი წევრობისაკენ. ეს არის სვლა გრძელვადიანი მშვიდობისაკენ და ყველაფერი ერთად ცოტა რთულია, მაგრამ ამას ყველაფერს ერთად შევძლებთ. ამას შევძლებთ მყარად, სიამაყით და რაც მთავარია, ორ ფეხს დგომით.
არ შეიძლება, ამ პოზიტიურ საუბართან ერთად, არ გავიხსენოთ ჩვენი უკანასკნელი დროის ძალიან დიდი, ბევრი წარმატება. თქვენ იცით, რომ ახლა კამპანია დაიწყო საქართველოს მთავრობამ, ამ ყველაფერს დიდი პიარი არ სჭირდება, მაგრამ მაგალითად, პირველად ისტორიაში ჩვენმა სპორტსმენებმა როგორ გვასახელეს, ამის ართქმა არ შეიძლება. საქართველოს ეროვნული ნაკრები, საკალათბურთო ნაკრები მსოფლიო ჩემპიონატზე გავიდა. პირველად ისტორიაში საქართველოს წყალბურთელთა ნაკრები, ევროპის რვა საუკეთესო გუნდს შორის მოხვდა. პირველად ისტორიაში საქართველოს ხელბურთის ეროვნული ნაკრები ევროპის ჩემპიონატზე გავიდა, ეს განვითარების, წინსვლის გარეშე შეუძლებელია. პირველად ისტორიაში, საქართველოს მორაგბეთა ეროვნულმა ნაკრებმა ექვსი ერის გუნდებთან გაიმარჯვა დაბოლოს, განსაკუთრებული სიხარული რამაც მოგვანიჭა, პირველად ისტორიაში, საქართველოს ეროვნული საფეხბურთო ნაკრები ევროპის ჩემპიონატზე გავიდა. მივულოცოთ და მადლობა გადავუხადოთ თითოეულ იმ გმირ ბიჭს, რომელმაც ეს სიხარული გვარგუნა. მივესალმები უდიდეს რაოდენობას და აქ რაოდენობაზე არ არის, ეს არ არის მთლად სწორი სიტყვა, მივესალმები იმ ადამიანებს, რომელთა მიმართ შეგვიძლია, ვთქვათ, რომ არ დარჩენილან დღეს საქართველოში არცერთი ოჯახი, რომლის თითოეული წარმომადგენელი აქ არ იყოს. ყველა კუთხის, სოფლის, ქალაქის ბევრი წარმომადგენელი აქ არის და ეუბნება მთელ მსოფლიოს, რომ ჩვენ ვართ ყველაზე ამაყი, დამოუკიდებელი, სუვერენული ქართველი ერი. საქართველოს გაუმარჯოს“, – განაცხადა მამუკა მდინარაძემ.

პარტია „ქართული ოცნების“ გენერალურმა მდივანმა კახა კალაძემ სახალხო შეკრების მონაწილეებს სიტყვით მიმართა. მისი თქმით, „უდიდესი კულტურის, უძველესი ისტორიის, ტრადიციების მქონე ქვეყანას“ კვლავაც მკაფიო გზავნილი აქვს მსოფლიოსთან- საკუთარი იდენტობის შენარჩუნებით და სრული დამოუკიდებლობით გახდეს ევროპული ოჯახის წევრი.
„როგორც ყოველთვის, ჩვენი ერთად ყოფნა, ჩვენი ერთად დგომა, ჩვენი ერთსულოვნება არის საქართველოს განვითარების, მისი უკეთესი ხვალინდელი დღის, მომავალი გამარჯვებების უმთავრესი საფუძველი.
ჩვენ შევიკრიბეთ აქ, რათა მთელ მსოფლიოს კიდევ ერთხელ ვუთხრათ მკაფიოდ: საქართველო არის პატარა ქვეყანა უდიდესი კულტურით, უძველესი ისტორიით, უნიკალური ენითა და დამწერლობით, საკუთარი ტრადიციებით, რწმენით, თავისუფლების სიყვარულით.
ჩვენ გვაქვს მიზანი – საკუთარი იდენტობით და სუვერენიტეტით, მყარი მორალური ღირებულებებით, ოჯახის სიმტკიცით, სარწმუნოების ხელშეუხებლობით, სრული დამოუკიდებლობით გავხდეთ დიდი ოჯახის წევრი, რასაც ევროპული ოჯახი ჰქვია.
გარკვეული ძალები, რომლებიც ვერაფრით ეგუებიან, რომ საქართველომ უკრაინის ბედი არ გაიზიარა, არ იშლიან მცდელობას, ქვეყანა არიონ და ხელისუფლებაში ის ადამიანები დააბრუნონ, რომელთა მმართველობამ საქართველოს უამრავი უბედურება მოუტანა. ამას ქართველი ხალხი, რა თქმა უნდა, არ დაუშვებს,“- განაცხადა კახა კალაძემ.