პარლამენტთან ფიზიკური დაპირისპირება მოხდა
ღამით ფიზიკური და სიტყვიერი დაპირისპირება მოხდა საქართველოს პარლამენტთან, სადაც კარვები აქვთ გაშლილი პროპორციულ საარჩევნო სისტემაზე გადასვლის მოთხოვნით, ნოემბერში დაწყებული აქციების მონაწილე სამოქალაქო მოძრაობების აქტივისტებს. მათი ინფორმაციით, ნასვამ მდგომარეობაში მყოფმა ორმა პირმა სიტყვიერი შეურაცხყოფა მიაყენეს, ერთი მათგანი კი ფიზიკურად გაუსწორდა აქტივისტს, რასაც ორმხრივი დაპირისპირება მოჰყვა. კონფლიქტში მონაწილეობდა მალხაზ მაჩალიკაშვილიც, რომელსაც პარლამენტთან ასევე, კარავი აქვს გაშლილი.
აქტივისტი ვახტანგ გაგნიძე ვარაუდობს, რომ ამ პირებს კავშირი აქვთ ორგანიზაციასთან „შევინარჩუნოთ სიცოცხლე“, რომელმაც პარლამენტთან კარავი 10 დეკემბერს, საღამოს გაშალა და აპროტესტებს, რომ აქციების ორგანიზატორი „სირცხვილია“ და სხვა სამოქალაქეო მოძრაობები საზოგადოების სახელით ლაპარაკობენ.
„შევინარჩუნოთ სიცოცხლე“-ს აქტივისტმა შალვა კუჭაშვილმა „რუსთავი 2“-ს უთხრა, რომ ერთ-ერთი პირი ძალადობის ფაქტამდე მათ კარავთან იმყოფებოდა და გაესაუბრა, თუმცა ორგანიზაციას ამ ადამიანებთან არანაირი კავშირი არ აქვს. კუჭაშვილის განცხადებით, ის მომხდარ ფაქტს გმობს.
პოლიციამ ორივე პირი დააკავა. გამოძიება სისხლის სამართლის კოდექსის 126-ე, ძალადობის მუხლით დაიწყო.
