ქუთაისის მერმა თანამდებობა დატოვა

ქუთაისის მერმა გიორგი ჭიღვარიამ თანამდებობა დატოვა. ამის შესახებ მან სოციალურ ქსელში დაწერა.

“2017 წლის ნოემბერში, ქუთაისელების დიდი ნაწილის გადაწყვეტილებით, მე წილად მხვდა პატივი, გავმხდარიყავი ქუთაისის არჩეული მერი. ეს იყო როგორც უდიდესი ნდობა, ამასთანავე უზარმაზარი პასუხისმგებლობაც. იმ დღიდან დღემდე, მე და ჩემმა გუნდმა ქალაქში მრავალი მნიშვნელოვანი პროექტი დავიწყეთ და დავასრულეთ, ბევრ მათგანზე ამ რთულ დღეებშიც კი არ შეჩერებულა მუშაობა. მიუხედავად იმისა, რომ ჩემი საარჩევნო ვადა ჯერ არ ამოწურულა, მივიღე გადაწყვეტილება, დავტოვო ქუთაისის მერის თანამდებობა და წავიდე პოლიტიკიდან. თუმცა, მე არ მივდივარ ჩემი ქალაქიდან და ყოველთვის მისი გულშემატკივარი ვიქნები. მინდა, მადლობა ვუთხრა ჩემს თანაქალაქელებს გამოცხადებული ნდობისთვის, ჩემს გუნდს – გვერდით დგომისთვის, მედიას – თანამშრომლობისთვის. მშვიდობასა და წარმატებას ვუსურვებ ჩემს ქალაქს!”, – წერს გიორგი ჭიღვარია “ფეისბუქში”.

აღსანიშნავია, რომ რამდენიმე დღის წინ დაკავებული თანამდებობა ონის მერმა ემზარ საბანაძემაც დატოვა. მასთან ერთად წავიდა მერის პირველი მოადგილეც. ამ დრომდე არც ონის ყოფილ მერს გაუკეთებია განმარტება, თუ რატომ გადადგა.

ცნობისთვის: ემზარ საბანაძე შს მინისტრის მოქმედი მოადგილის, კახა საბანაძის მამაა.

„საერთაშორისო გამჭვირვალობა–საქართველოს“ ქუთასის ოფისში გიორგი ჭიღვარიასგან გადადგომის მიზეზის განმარტებას ითხოვენ.

ორგანიზაციაში აცხადებენ, რომ ქალაქის არჩეულმა მერმა საზოგადოებას უნდა აუხსნას, რატომ დატოვა პოსტი, მით უფრო, რომ ეს მოხდა ქვეყანაში გამოცხადებული საგანგებო მდგომარეობის ფონზე.

„საზოგადოებისათვის უცნობია ის მიზეზები, რატომ დატოვა პირდაპირი წესით არჩეულმა მერმა საგანგებო მდგომარეობის დროს თანამდებობა. ბატონი გიორგი, როგორც არჩეული მერი, ანგარიშვალდებულია ამომრჩევლის წინაშე მიზეზებზე ისაუბროს. მიგვაჩნია, რომ მან უნდა გააკეთოს განმარტება გადადგომის მიზეზებთან დაკავშირებით და ამომრჩეველმა უნდა იცოდეს, რატომ დატოვა მის მიერ არჩეულმა მერმა თანამდებობა“,–ამბობს “საერთაშორისო გამჭვირვალობა -საქართველოს” ქუთაისის ოფისის ხელმძღვანელი ლელა მოწონელიძე.

დღესვე ცნობილი გახდა, რომ ქუთაისის მერის მოვალეობას ვიცე–მერი, დავით ერემეიშვილი შეასრულებს.