სამართალდამცველებმა პარლამენტის წინ, სადაც აქცია დაიწყო, დემონსტრანტების წინააღმდეგ წყლის ჭავლი გამოიყენეს
მოქალაქეებმა რუსთაველის გამზირზე შეკრება უკვე დაიწყეს. აქციის დაწყებისთანავე, 19:00 საათზე,თბილისში, რუსთაველის გამზირზე აქცია რამდენიმე წუთია, დაიწყო და სპეცრაზმმა, პარლამენტის შენობის ეზოდან, მათ წინააღმდეგ უკვე წყლის ჭავლი გამოიყენა. ამით, ისინი დემონსტრანტებს შენობასთან მიახლოვების საშუალებას არ აძლევენ.
აქციის მონაწილეები რკინის ჯებირზე ბრახუნით გამოხატავდნენ პროტესტს. მას შემდეგ კი რაც წყლის ჭავლი გამოიყენეს, ისმოდა საპროტესტო შეძახილები.
დემონსტრანტები სკანდირებენ: “მონებო, მონებო”. გარდა ამისა, იქ შეკრებილები აცხადებენ, რომ სპეცრაზმმა გამოიყენა ცრემლსადენი გაზიც.
აქციის მონაწილეების ძირითადი ნაწილი საავტომობილო გზაზე დგას, თუმცა მომიტინგეთა შედარებით მცირე ნაწილი შენობასთან ახლოს, წყლის ჭავლის სიახლოვეს გამოხატავს პროტესტს. რამდენჯერმე გაისროლეს პიროტექნიკაც.
პარლამენტის გვერდით, ჩიტაძის ქუჩა სრულად აქვთ დაკავებული საპატრულო და კრიმინალური პოლიციის თანამშრომლებს.
მოქალაქეები ადგილზე რჩებიან და მათ სხვადასხვა ლოკაციიდან უერთდებიან აქციის ის მონაწილეებიც, რომლებმაც მსვლელობა სხვადასხვა ლოკაციიდან დაიწყეს.
ამასთან, იმართება მსვლელობა ილიას სახელმწიფო უნივერსიტეტიდან პარლამენტის შენობამდე. ილიაუნის სტუდენტებს თსუ-ის სტუდენტებიც შეუერთდებიან.
ცნობისთვის, აქციის მონაწილეები აპროტესტებენ “ქართული ოცნების” გადაწყვეტილებას, რომლის თანახმადაც, საქართველო 2028 წლამდე, ევროკავშირში წევრობაზე მოლაპარაკებების საკითხს აჩერებს. აქციები იმართება როგორც დედაქალაქში, ასევე რეგიონებში.
თბილისში და საქართველოს ქალაქებში საპროტესტო გამოსვლები 28 ნოემბრიდან დაიწყო, მას შემდეგ, რაც „ქართული ოცნების” ხელისუფლებამ გადაწყვიტა, 2028 წლის ბოლომდე დღის წესრიგში არ დააყენოს ევროკავშირთან მის წევრობაზე მოლაპარაკების გახსნის საკითხი და 2028 წლის ბოლომდე უარი თქვას ევროკავშირის საბიუჯეტო გრანტებზე.
ამასთან, „ქართული ოცნების” მთავრობა ირწმუნება, რომ მიზნად რჩება 2030 წლისთვის ევროკავშირში საქართველოს შესვლა.
მმართველმა პარტიამ ეს გადაწყვეტილება ოპოზიციის მიერ არალეგიტიმურად მიჩნეული, მე-11 მოწვევის პარლამენტის პირველი სხდომიდან რამდენიმე დღეში გამოაცხადა.
საპროტესტო აქციების მონაწილეები ხელისუფლებას ევროინტეგრაციის პროცესის შეჩერებაში ადანაშაულებენ და ხელახალ საპარლამენტო არჩევნებს მოითხოვენ.
1-2 დეკემბერსაც შსს-ს სპეცრაზმელებმა რუსთაველის გამზირზე საპროტესტო აქციის მონაწილეთა დასაშლელად არაერთხელ გამოიყენეს წყლის ჭავლი და ცრემლმდენი გაზი. პოლიცია ისევ ფიზიკურად გაუსწორდა არაერთ დემონსტრანტს.
