,,საქართველოს საზოგადოების მილიონ 200 ათასამდე ადამიანი „ქართულ ოცნებას“ უჭერს მხარს,,-ოცნება

არანაირი მტკიცებულება არ არსებობს, რომ არჩევნები გაყალბდა – რა თქმა უნდა, ამომრჩევლის მობილიზებაში პარტიაც ჩართულია, – ამის შესახებ „ქართული ოცნების“ გენერალურმა მდივანმა, კახა კალაძემ ჟურნალისტებთან განაცხადა.
მისი თქმით, ოპოზიციამ უკვე ყველანაირი რესურსი ამოწურა.
„სრული პასუხისმგებლობით გეუბნებით და აბსოლუტურად გულწრფელი ვარ, არანაირი მტკიცებულება არ არსებობს, რომ არჩევნები გაყალბდა. ნახეთ, რამხელა სხვაობაა „ქართულ ოცნებასა“ და მეორე ადგილზე გასულ პარტიას შორის – გინდ ხმების რაოდენობით, გინდ პროცენტულად. არანაირი ფაქტი და მტკიცებულება არ არსებობს. უკვე ყველანაირი რესურსი ამოწურეს, თენგოსაც აღარაფერი დარჩა სათქმელი და ნოდარ მელაძის რაღაც გაუგებარი სიუჟეტით სპეკულირებენ. რა თქმა უნდა, ამომრჩევლის მობილიზებაში პარტიაც ჩართულია, რასთან დაკავშირებით დღეს შალვა პაპუაშვილმაც გააკეთა განცხადება“, – განაცხადა კახა კალაძემ.
ამავე თემაზე საუბრისას, კალაძემ განაცხადა, რომ „ქართულ ოცნებას“ ჰყავს ადამიანები, რომლებიც უზრუნველყოფენ მოქალაქეების მობილიზებას და იმას, რომ ადამიანი მივიდეს და ხმა მისცეს პარტიას, რომელსაც მხარს უჭერს.
„არცერთი ფაქტი არ გაქვთ წარმოდგენილი, მხოლოდ სიტყვების ბრახაბრუხია, სპეკულირებთ და არანაირი მტკიცებულება და ფაქტი არ გაქვთ ამასთან დაკავშირებით.
გარტყმაში არ ხართ საერთოდ რას ნიშნავს არჩევნები. „ქართულ ოცნებას“ 50 000 – ზე მეტი პარტიის წევრი გვყავს, გარდა ამისა, გვყავს ზონის უფროსები კონკრეტულ უბნებსა და რაიონებში. გვყავს უბნის უფროსები, ე.წ აგიტატორები – საკმარისია ეს? გვყავს ადამიანები, რომლებიც უზრუნველყოფენ ადამიანების მობილიზებას და იმას, რომ ადამიანი მოვიდეს და ხმა მისცეს პარტიას, რომელსაც მხარს უჭერს. ამაზე ტრენინგებს გავდიოდით NDI-ის და IRI-ის დაფინანსებით. თვითონ გვიტარებდნენ ლექციებს, თუ როგორ უნდა იმოქმედოს პარტიამ მხარდამჭერებთან მიმართებაში, როგორ უნდა მოაბილიზოს და ა.შ“, – განაცხადა კალაძემ.

საქართველოს საზოგადოების დიდი ნაწილი – მილიონ 200 ათასამდე ადამიანი „ქართულ ოცნებას“ უჭერს მხარს, რაც დიდი ძალა და არგუმენტია იმისთვის, რომ ჩვენმა პარტნიორებმა შესაბამისი დასკვნები გააკეთონ, მაგრამ არც იმდენად დიდია, რომ გლობალური დაპირისპირების პირობებში პოზიცია მყისიერად შეცვალონ! – ამის შესახებ ჟურნალისტებს პარლამენტის პირველმა ვიცე-სპიკერმა გია ვოლსკიმ განუცხადა.
მისი თქმით, „ნაციონალური მოძრაობის“ კლასტერთან დაკავშირებულმა მედია საშუალებების მიერ წარმოდგენილი მასალით არ დასტურდება, რომ 26 ოქტომბრის არჩევნების დროს მომხდარმა ცალკეულმა გადაცდომებმა არჩევნების შედეგებზე გავლენა იქონია.
„ამას საერთაშორისო დამკვირვებლების ძალიან დიდი კორპუსი ადასტურებს, მაგრამ ადგილი აქვს არა მხოლოდ შეცდომაში შეყვანის მცდელობას, არამედ გარკვეული ამოცანის შესრულებას, რათა გეგმა ბოლომდე მიიყვანონ – ეს არის დესტაბილიზაცია, სახელმწიფო გადატრიალების ორგანიზება, რევოლუციური პროცესების განვითარება და ხელისუფლებაში მოსვლა.
საქართველო დასავლელი პარტნიორებისთვის ყოველთვის საკმაოდ ერთგული და სანდო პარტნიორი იყო. ეს გამოიხატა არა მხოლოდ პოლიტიკურ სივრცეში, არამედ ბრძოლის ველზეც. გამოჩნდა ახალი სუბიექტების ჯგუფი, ვინც ამბობს, რომ ამ მოცემულობაში შეუძლიათ ყველაფერი შეასრულონ – დაწყებული ცალ ფეხზე დგომით, დასრულებული რუსეთთან საომარ მოქმედებაში ჩართვით. ოპოზიციის ერთადერთი გამოსავალი არის ეს და არა საზოგადოების დიდი ნაწილის მხარდაჭერა“, – განაცხადა გია ვოლსკიმ.

„ქართული ოცნების“ პოლიტსაბჭოს წევრი, პარლამენტის თავმჯდომარე შალვა პაპუაშვილი არჩევნების სავარაუდო გაყალბებაზე, ხმის მიცემის ფარულობის დარღვევასა და ამომრჩეველზე სავარაუდო ზეწოლის შესახებ ოპოზიციის ბრალდებებს პასუხობს. ამის შესახებ მან დღეს პარტიის ოფისში გამართულ ბრიფინგზე ისაუბრა.

„კვლავ მიწევს თქვენ წინაშე გამოსვლა იმისთვის, რომ დეზინფორმაციების მორიგი მხილება იყოს. უკვე მესამე სერიაა იმ სერიალის, რომელსაც ოპოზიცია, რამდენიმე მილიონერი NGO და მათი უცხოელი პატრონები გვაყურებინებენ ქართველ ხალხს. ნათქვამია, რომ ისტორია პირველად მეორდება როგორც ტრაგედია და შემდეგ როგორც ფარსი. ტრაგედიად ეს ე.წ. გაყალბებული არჩევნების ისტორია განმეორდა ზუსტად 4 წლის წინ და სხვათა შორის გუშინ იყო 3 ნოემბერი. 4 წლის წინ 2020 წლის 3 ნოემბერს შედგა ის ისტორიული შეკრება ოპოზიციისა „მთავარი არხის“ სტუდიაში, სადაც მათ ხელი მოაწერეს პირობას, რომ არავითარ შემთხვევაში არ შევიდოდნენ პარლამენტში, შემდეგ დაეწყვნენ და ყველა შევიდა პარლამენტში. ახალ ეს უკვე, როგორც ფარსად ისე მეორდება, იგივე მსახიობები, იგივე დამდგმელი რეჟისორი, მაგრამ ჰგონიათ, რომ მაყურებელიც იგივეა, მაგრამ ამ ფარსს უკვე ყველა კარგად ხვდება და ამას აკვირდება თავად ეს ხალხიც. ახლა, ვნახოთ მესამე სერია ჩვენი მხილებისა. სამ საკითხს შევეხები – ხმის მიცემის ფარულობაზე, რომელზეც ისტერია ატეხა ერთმა კონკრეტულმა NGO-მ, ამომრჩეველთა მობილიზება და მაღალი მხარდაჭერის მიზეზებთან დაკავშირებით არსებული კონსპირაციები. პირველი, რაც შეეხება დეზინფორმაციას ფარულობის დარღვევას, შეგახსენებთ, რომ ამ მეთოდით – ელექტრონული მთვლელების მეთოდით, აქამდე 6 არჩევნები ჩატარდა, 2021 წლიდან მოყოლებული, არცერთ არჩევნებზე ფარულობასთან დაკავშირებით არავის პრეტენზია არ ჰქონია, არც ამ არჩევნებზე არავის პრეტენზია არ ჰქონია, ბიულეტენებთან ე.წ მელანთან დაკავშირებით რაიმე პრობლემა არ ჰქონია. მხოლოდ 5 დღის თავზე, ვინაიდან სხვა არგუმენტი ვერ ნახეს, მოიფიქრეს ეს როგორც საბაბი და ამით ამტკიცებენ, რომ ფარულობა არის დარღვეული.

ახლა ვნახოთ, რა ხდება საერთაშორისო პრაქტიკაში. პირველი – 2020 წლის პოლონეთის საპარლამენტო არჩევნებზე გამოიყენება (ელექტრონული არ არის და ბიულეტენებით ხდება კენჭისყრა) გამჭვირვალე ყუთები, ბიულეტენები კონვერტშიც კი არ თავსდება. ჩვენთან კი, ბიულეტენი ან კონვერტში, ან ჩარჩო კონვერტში თავსდება. პოლონეთში ხედავთ, რომ არ არის კონვერტში, რომ დახედავთ, ნახავთ, რომ ჩანს კიდევაც ვის აძლევს ხმას ამომრჩეველი. ანუ, რა უნდა თქვას საია-მ, რომ პოლონეთში ფარულობაა დარღვეული და 2020 წლის საპარლამენტო არჩევნები უნდა გაუქმდეს?! გადავიდეთ 2024 წლის ბულგარეთის საპარლამენტო არჩევნებზე, აქაც გამჭვირვალე ყუთია, ბიულეტენები კონვერტში არ თავსდება, როგორც ხედავთ პარტიის ნომრები და ამომრჩევლის არჩევანი ჩანს. ანუ რას ფიქრობს „ახალგაზრდა იურისტთა ასოციაცია“, მისი დამფინანსებელი ევროკავშირის წევრი, ბულგარეთის საპარლამენტო არჩევნები უნდა გაუქმდეს? სულ ახლახან ორი კვირის წინ, იყო ლიეტუვის საპარლამენტო არჩევნები. ნახევრად გამჭვირვალე ყუთია, ადრე გამჭვირვალე ჰქონდათ. ბიულეტენები კონვერტში არ თავსდება და ხედავთ ჩაგდების დროს თუ ვინ ჰყავს არჩეული ლიეტუველ ამომრჩეველს.

გუშინ იცით, რომ შედგა არჩევნები მოლდოვაში, რომელსაც ოპოზიცია გაფაციცებით აკვირდებოდა. ჩვენ ვნახეთ სურათი, სადაც აქაც ნახევრად გამჭვირვალე ყუთია და ბიულეტენები არ თავსდება კონვერტში. ანუ რას ფიქრობს „ახალგაზრდა იურისტთა ასოციაცია“, რომ მოლდოვაში საპრეზიდენტო არჩევნები უნდა გაუქმდეს? ამას უპირებს ახალგაზრდა იურისტთა ასოციაცია მოლდოველ ხალხს? ეს კიდევ ერთხელ აჩვენებს თუ რამხელა თაღლითობასთან გვაქვს უკვე საქმე ზოგიერთი „ენჯეოს“ მხრიდან, როდესაც ვეღარ პოულობენ ვერცერთ არგუმენტს თავისი პოლიტიკური მიზნების განსახორციელებლად და ეჭიდებიან ხავსს. ოღონდ ხავსს, რომელიც უკვე დიდი ხანია დანახული აქვს ქართველ ხალხს. ეს არის პრობლემა იმის, რომ არასამთავრობო ორგანიზაციები, განსაკუთრებით ის, ვინც ე.წ. სადამკვირვებლო ორგანიზაციას უწოდებს საკუთარ თავს და მოქმედებს უცხოური დაფინანსებით, ჩართული იყვნენ საარჩევნო კამპანიაში, მიზნად ჰქონდათ კონკრეტული საარჩევნო შედეგის დადგომა, იყვნენ „ქართული ოცნების“ წინააღმდეგ და ახლა, როცა ეს შედეგი არ დადგა, ისინი ცდილობენ საკუთარი უცხოური დაფინანსება გამოიყენონ იმისთვის, რომ ქართველ, მოლდოველ, ბულგარელ, ლიეტუველ და პოლონელ ამომრჩევლებს წაართვან არჩევნები. იმიტომ, რომ ეს არის სინამდვილეში რასაც ემსახურება ეს ბოდვა, რომელსაც ჩვენ „ახალგაზრდა იურისტთა ასოციაციისგან“ ვისმენთ. ეს უკვე აღარ არის პრობლემა ერთი არასამთავრობო ორგანიზაციის, ეს არის პრობლემა იმ დონორების, რომლებიც ამ თაღლითურ დასკვნების შესაძლებლობას აძლევენ ასეთ ორგანიზაციებს, რომლებიც პირდაპირ დეზინფორმაციულად ცდილობენ წაართვან არჩევანი ქართველ ხალხს. ამიტომ დონორების პასუხისმგებლობა არის და ვეღარ გაექცევიან ამჯერად ამ პასუხისმგებლობას. მინდა, ყურადღება მიაქციონ, რომ მათი ფულით ხდება დემოკრატიის ძირის გამოთხრა.

შემდეგი დეზინფორმაცია ამომრჩევლის მობილიზაციასთან დაკავშირებით – გაიარეს რა ეს თემები, ვერაფერი ვერ მოიფიქრეს, ვერც თენგომ რომ ახსნა და ვერც ტოპტვინებმა, ბოლოს „ტვ პირველის“ იმედად დარჩა ბატონი ხაზარაძე და დანარჩენი ოპოზიცია. აღმოაჩინეს, რომ თურმე პარტიები საკუთარ ამომრჩეველთან არიან კავშირზე, საკუთარ ამომრჩეველს ესაუბრებიან, ამობილიზებენ საკუთარ ამომრჩეველს. მათ შორის, ამან უკვე მიიღო ფაშისტური ხასიათი სოციალურ ქსელში. ჩვენ ვნახეთ, რომ ყოფილი სახალხო დამცველი ავრცელებს პერსონალურ ინფორმაციას, თან ისეთი კონტექსტით, რითაც ადამიანებს პირდაპირ მონიშნავს თავდასხმის სამიზნედ. ის ავრცელებს სიებს, სადაც არიან ჩვენი კოორდინატორები, რომლებიც პასუხისმგებელნი იყვნენ ამომრჩეველთან დაკავშირებაზე, ავრცელებს ამ სიებს, ამ ადამიანების სახელებს და გვარებს. ერთ-ერთი სიაში მას წაშლილი აქვს პირადი ნომრები, ეტყობა ვერ ხვდება, რომ სახელი და გვარიც პირადი ინფორმაციაა. ავრცელებს ამ ინფორმაციას, თან იმ კონტექსტში, რომ პირდაპირ მონიშნული ჰყავს ისინი, როგორც სამიზნე ვერბალური თუ ფიზიკური თავდასხმისა. აქაც ვიტყვი, რომ ყოფილი სახალხო დამცველი დღეს იცით, რომ არის არასამთავრობო ორგანიზაციის წარმომადგენელი. ის ფინანსდება ევროკავშირის ბიუჯეტიდან და რა თქმა უნდა, ასეთი ფაშისტური კამპანიები, როდესაც შესაძლებელი ხდება ევროკავშირის ბიუჯეტიდან დაფინანსების წყალობით, ეს არის ევროკავშირის პასუხისმგებლობა. ერთ-ერთი დამფინანსებელი ამ ორგანიზაციის არის „ევროპის დემოკრატიის ფონდი“. შეგახსენებთ, ეს ის ფონდია, რომელიც ფარულად ხარჯავს ფულს საქართველოში, მათ შორის პოლიტიკურ აქტივობებსა და პოლიტიკურ პარტიებში. არ ვიცი რანაირად იყო ამდენი ხანი ეს ადამიანი სახალხო დამცველი, როცა ვერ ხვდება, რომ ამხელა დარღვევას ჩადის, როდესაც ადამიანის პერსონალურ ინფორმაციას ავრცელებს, თან იმ კონტექსტში, რომ მტრად ჰყავს მონიშნული შესაბამისი კლავიატურის ვერბალური ლომებისთვის და ზოგიერთი ფიზიკური მოძალადისთვის, ამ ადამიანების წინააღმდეგ.

ახლა რა ხდება სინამდვილეში – ჩვენ ამ დღეებში, მათ შორის, ამ ცნობილი სიუჟეტით, რომელსაც მთელი ოპოზიცია ასე სიხარულით შეხვდა, ვინაიდან თენგოს და გრიგოლის შემდეგ, ტოპტვინების შემდეგ, იმედი გადაწურული ჰქონდათ და ჩამოეკიდნენ ამ სიუჟეტს, აღმოაჩინეს, თურმე, ჰოი საოცრებავ, თურმე საქართველოში პარტიები არიან დაკავებული პარტიული სამუშაოთი – იცოდე და იცნობდე შენს ამომრჩეველს უზრუნველყო მათი არჩევნებზე მოსვლა. ჩვენ არაერთხელ ვთქვით, ყველა პარტია აკეთებს ამას, ვისაც ამისი რესურსი აქვს და თავი პარტიად მიაჩნია. ეს არის საერთაშორისოდ აპრობირებული მეთოდი და ჩვენ არაერთხელ ვთქვით, რომ ამაზე ტრენინგებსაც კი ატარებდა IRI თუ NDI.

წარმოგიდგენთ ახლა სახელმძღვანელოებს: 1. ეს გახლავთ NDI-ს სახელმძღვანელო საარჩევნო კამპანიის ორგანიზებასთან დაკავშირებით. 350-გვერდიან სახელმძღვანელოში დეტალურად არის აღწერილი, როგორ უნდა შეადგინო სიები, ამომრჩევლის ბაზები, როგორ უნდა დაყო ისინი შენს მომხრეებად, მოწინააღმდეგეებად, გადაუწყვეტელებად, როგორ უნდა გქონდეთ მათთან კავშირი და კომუნიკაცია და მათ შორის, რატომ არის ეს ყველაფერი საჭირო. ამ სახელმძღვანელოში საუბარია, რომ ამომრჩევლის სიყვარული საკმარისი არ არის, თუ მათ მხოლოდ სახლიდან უყვარხარ. მნიშვნელობა არ აქვს, რამდენად კარგი შედეგი გაქვთ კვლევებში, თუკი ამომრჩეველი არ მივა არჩევნებზე. ასევე, ამბობდა, რომ გადაამოწმეთ მისცეს თუ არა ხმა და დაარწმუნეთ, რომ მივიდნენ ხმის მისაცემად, თუკი ეს ჯერ არ გაუკეთებიათ. პირდაპირ აღწერილი არის პროცესი მთლიანად, დეტალურად. ყველა პარტიას ამ ქვეყანაში ამგვარ ტრენინგებში, სემინარებში მიუღიათ მონაწილეობა, სადაც ხდება საერთაშორისო გამოცდილების გაზიარება. დეტალურად არის აღწერილი, როგორ უნდა შედგეს ბაზები, რა ინფორმაცია უნდა იყოს მასში, უფრო მეტი ინფორმაცია არის რეკომენდებული, ვიდრე ამ გავრცელებულ სიებში არის და შემდეგ როგორ უნდა იყოს მათთან კომუნიკაცია და დარწმუნება, რომ მივიდნენ არჩევნებზე, როგორ გადამოწმდეს არჩევნების დღეს იყვნენ თუ არა ისინი არჩევნებზე და შესაბამისად როგორ უნდა მოხდეს დარწმუნება, რომ მივიდნენ არჩევნებზე. ასევე, გახლავთ IRI-ს სახელმძღვანელო კამპანიის ორგანიზებასთან დაკავშირებით და აქაც ნახავთ ასეთ ციტატებს – „გადამწყვეტია ის მხარდამჭერი, რომელიც ხმას აძლევს. თქვენი შრომა შეიძლება დაიკარგოს თუკი არ უზრუნველყოფთ, რომ თქვენი ამომრჩეველი მივიდეს არჩევნებზე“. 2. შეადგინეთ ამომრჩევლების თქვენი საკუთარი მონაცემთა ბაზა, სახელი, ტელეფონის ნომერი და ა.შ. მთელი სიაა ჩამოთვლილი, რა უნდა იყოს ამ ბაზაში. 3. არჩევნებამდე ერთი კვირით ადრე დაუკავშირდით ყველა მხარდამჭერს და შეახსენეთ, რომ მივიდნენ არჩევნებზე. 4. არჩევნების დღეს მიაკითხეთ და დაეხმარეთ, რომ მივიდნენ უბანზე მათ შორის, ტრანსპორტირებით და ასე შემდეგ. აი ეს არის ის ფარსი, რასთანაც გვაქვს საქმე ოპოზიციის თუ არასამთავრობო ორგანიზაციების სახით, როდესაც არ აქვთ არგუმენტი და ეძებენ საბაბებს იმისთვის, რომ მოარგონ საკუთარ წარმოდგენას სამყაროზე. მათი წარმოდგენა სამყაროზე, ფაქტობრივად ფსევდორელიგიურ მიმართულებად ჩამოყალიბდა. პარტიულ წევრობასა თუ კუთვნილებას მნიშვნელობა არ აქვს. ყველა, ვინც ამ ფილოსოფიით მოქმედებს, ამ იდეოლოგიის, „ნაცობის“ წარმომადგენელი არის. შეუძლებელია მათ სამყაროში, რომ ქართველი ხალხი უარს ეუბნებოდეს ხელისუფლებაში მოსვლაზე და ახლა ამ ფსიქოლოგიური პრობლემის წინაშე არიან, როდესაც ნამდვილ რეალობას შეეჯახნენ. ასე რომ, ესეც სრული სიყალბე, დეზინფორმაცია, თითქოს ამომრჩევლების და მხარდამჭერების სიების შედგენა, ორგანიზება, მათთან კავშირი იყოს რაღაც საკითხი, რომელსაც ქართული პრაქტიკა არ იცნობს. ყველა არჩევნებზე, ყველა პარტია, ვისაც ამის რესურსი აქვს და გარკვეულწილად, დიდი პარტიაა, ასე მუშაობს. ეს არის პარტიული მუშაობის მთავარი პრინციპი და უცხოური პრაქტიკა ზუსტად ამაზე მეტყველებს. წარმოგიდგინეთ მათ შორის საერთაშორისო გაიდლაინები და სახელმძღვანელოები.

მესამე, დეზინფორმაცია მაღალ მხარდაჭერასთან დაკავშირებით. აქაც ჩვენ ვნახეთ მათ შორის, ქსენოფობიური კამპანია, რომელშიც სალომე ზურაბიშვილიც ჩართული არის, ენჯეოებიც ჩართულები არიან და ოპოზიცია არის ჩართული, როდესაც გამოარჩევენ გარკვეულ ოლქებს და რეგიონებს ჩვენ ქვეყანაში, რომელიც განსაკუთრებით კომპაქტურად არის დასახლებული ეთნიკური უმცირესობის წარმომადგენლების მხრიდან და იმ კონტექსტში წარმოადგენენ მაღალ მხარდაჭერას, თითქოს ხდება ადამიანებით მანიპულირება. ეს არის ჩვეულებრივი ქსენოფობიური კამპანია, რომელიც ასევე, კიდევ ერთხელ, წარმოებს იმ ორგანიზაციების მხრიდან, რომლებიც უცხოეთიდან ფინანსდება. რასთან გვაქვს სინამდვილეში საქმე და ჩავხედოთ ახლა რა არის რეალობა – თქვენ იცით, რომ ამ არჩევნებზე აღარ იყო მაჟორიტარული სისტემა, თუმცა შემოღებული იქნება ე.წ. დელეგატის ინსტიტუტი. ყველა პარტიას შეეძლო საკუთარ საარჩევნო სიაში კონკრეტული ადამიანი მიეკუთვნებინა ამა თუ იმ ოლქზე და ეთქვა, რომ აი, ეს ადამიანი იქნება თქვენი ოლქის წარმომადგენელი შემდეგ პარლამენტში.

„ქართულმა ოცნებამ“ ყველა ოლქში, ოცდაათივე ოლქში დააყენა დელეგატები და გვყავდა ყველა დელეგატი, მათ შორის, უმეტესობა არის მოქმედი მაჟორიტარი, რომელსაც ისედაც კავშირი აქვს რეგიონთან და ყველა დელეგატი იყო რეგიონის წარმომადგენელი, რეგიონთან კავშირის მქონე ადამიანი, რომელსაც რეგიონის მოსახლეობა ჩათვლიდა საკუთარ ხმად და წარმომადგენლად პარლამენტში. კიდევ ერთხელ, ყველა ოლქში გვყავდა ჩვენ დელეგატები.

ასევე, ჩვენ ჩავატარეთ არაერთი კარდაკარი, როდესაც ყველა ოჯახში, დელეგატებთან ან ჩვენი შტაბის წარმომადგენლებთან ერთად, ყველა ოჯახში მივედით. მათ შორის, კარდაკარის ერთ-ერთი მთავარი ამოცანა არის ზუსტადაც, რომ ამომრჩევლების აღრიცხვა, ნახვა, ვინ არის ჩვენი ამომრჩეველი, ვინ შეიძლება დავარწმუნოთ, რომ იყოს ჩვენი ამომრჩეველი და ა.შ. კარდაკარის მიზანი, ასევე არის ჩვენი საინფორმაციო ბროშურების დარიგება და ამაზე ცალკე კარდაკარი გვქონდა, როდესაც მიღწევებსა და სარჩევნო პროგრამასთან დაკავშირებით ბროშურები დავარიგეთ. იცით, რომ ყველა რეგიონში ჩატარდა მასშტაბური ღონისძიება, სადაც ყველა ვიყავით წარმოდგენილი და მათ შორის, კიდევ ცალკე, ჩვენ, პირადად მეც, რეგიონში დავდიოდით და გვქონდა შეხვედრები. საერთო ჯამში, დელეგატებს თუ შევხედავთ, აღრიცხული აქტივობები არის შემდეგი: 5048 შეხვედრა ჩაატარეს მხოლოდ დელეგატებმა, ეს არის აღრიცხული შეხვედრები, რომელიც 50 დღეში, 30-მა დელეგატმა ჩაატარა, რაც დღეში საშუალოდ გამოდის 100 შეხვედრა ქვეყნის მასშტაბით და თითო დელეგატმა, საარჩევნო კამპანიის, ამ 50 დღის განმავლობაში, 170 შეხვედრა ჩაატარა. ვიყავით ყველა სოფელში, ვიყავით ყველა უბანში, მივედით თითქმის ყველა ოჯახში, იმისთვის რომ გვესაუბრა მათთან, აგვეხსნა, თუ რა არის ჩვენი საარჩევნო პლატფორმა, დაგვერწმუნებინა, რომ მხარი დაეჭირათ „ქართული ოცნებისთვის“. რას აკეთებდა ამ დროს ოპოზიცია? – მათ, არავის, არც ერთ პარტიას, არც ერთი დელეგატი არ ჰყავდა დასახელებული, ნული. საერთოდ არ ჰყავდათ, არ უთხრეს ხალხს, რომ იცით რა, თქვენი წარმომადგენელი ეს ადამიანი იქნება პარლამენტში. მათ არ ჰყავდათ გამსვლელ სიებში რეგიონიდან კანდიდატები, რომელიც რეგიონის სახე იქნებოდა, სადაც იმერლები, კახელები, აჭარლები, ჩათვლიდნენ, რომ ეს არის ჩემი ხმა და წარმომადგენელი პარლამენტში. მათ შორის, არ ჰყავდათ ეთნიკური ჯგუფების წარმომადგენლები გასვლით სიებში, საერთოდ არ ჰყავდათ. ერთ პარტიას ჰყავდა მხოლოდ და ისიც იმ რეგიონის წარმომადგენელი არ არის, სადაც გარკვეული ეთნოჯგუფები კომპაქტურად არიან დასახლებული. საერთოდ არ ჩაუტარებიათ რეგიონში კამპანია. თქვენ ნახავდით, რომ იყო რამდენიმე ჩასვლა კამერების თანდასწრებით. რეგიონში, სხვათა შორის, არ ვგულისხმობ მხოლოდ თბილისს მიღმა რეგიონს, თბილისსაც ვგულისხმობ. თბილისის ოლქებში მათ შეხვედრები არ ჰქონიათ, ჰკითხეთ, თქვენც გაიკითხეთ და ჰკითხეთ, თბილისში თუ მის გარეთ, თუ ხედავდნენ ისინი ოპოზიციური პარტიების წარმომადგენლებს, რომლებიც სოფელ-სოფელ, უბან-უბან დადიოდნენ და ხვდებოდნენ ადამიანებს. ფაქტობრივად არ ჰქონდათ კამპანია რეგიონში და ძირითადად, მათი კამპანია იყო ტელევიზია და უცხოელების მხარდაჭერა, მეტი არაფერი. ნული დელეგატი საქართველოს სხვადასხვა ოლქიდან, ამასობაში ჰქონდათ ვიზიტები აშშ-ში, ბელგიაში, ნორვეგიაში, შვედეთში, პოლონეთში, პორტუგალიაში, იტალიაში ეს საარჩევნო კამპანიის დროს. ნაცვლად იმისა, რომ მისულიყვნენ და ადამიანებთან ესაუბრათ, დადიოდნენ და უცხოელებს ელაპარაკებოდნენ. ამან თავისი შედეგი გამოიღო. ხედავთ, რომ მათი ამომრჩევლები უფრო უცხოელები არიან, ვიდრე საქართველოს მოსახლეობა და ვხედავთ, გარედან როგორი მხარდაჭერა აქვთ. თუკი შევხედავთ 10 ყველაზე მაღალი მხარდაჭერის მქონე ოლქს, სადაც „ქართულმა ოცნებამ“ ყველაზე მაღალი მხარდაჭერა მიიღო. აქ არ არის ოლქები, სადაც მხოლოდ შეიძლება ეთნიკურად კომპაქტურად დასახლებული ოლქები იყოს. ესენია: ნინოწმინდა, ახალქალაქი, საჩხერე, ბოლნისი, მარნეული, ლენტეხი, დმანისი, ყაზბეგი, მესტია, წალკა. 64 მუნიციპალიტეტიდან და თბილისს თუ ერთ მუნიციპალიტეტად ავიღებთ, 60-ში, ანუ 94%-ში „ქართულმა ოცნებამ“ 50% -ზე მაღალი მხარდაჭერა მიიღო, აქედან 30-ში მიიღო 60-დან 70-მდე პროცენტის მხარდაჭერა და ეს აჩვენებს საერთო ჯამში, როგორ იყო გადანაწილებული. ამ ქსენოფობიურ კამპანიებს, რომელსაც მათ შორის მედია და „ენჯეოებიც“ აწარმოებენ, როდესაც საუბარი აქვთ ნინოწმინდასა და ახალქალაქზე, სადაც მათ არ ჰყავდათ არათუ დელეგატი დასახელებული, არათუ რეგიონის წარმომადგენელი დასახელებული, არამედ ეთნიკური ჯგუფიდან წარმომადგენელი საერთოდ არ ჰყავდათ სიებში. თქვენ იცით, რომ ჩვენი მოქმედი მაჟორიტარი ამ ოლქიდან, ნინოწმინდა-ახალქალაქიდან არის სამველ მანუკიანი, რომელიც წლებია, ამ რეგიონს წარმოადგენს, რომელიც ახლაც, როგორც უკვე დელეგატი, აქტიურად იყო ჩართული, მიდიოდა ყოველ ოჯახში, ყოველ უბანში, ყველას ესაუბრებოდა და რა გგონიათ, რატომ უნდა მიეცათ ამ ოლქის წარმომადგენლებს გვარამიასთვის, ან ხაზარაძისთვის ხმა? ჰგონიათ რომ ტელევიზორში დაინახავენ და ტელევიზორის ხათრით უნდა მიეცათ ხმა? იციან საერთოდ, რა არის ამ ადამიანებისთვის მნიშვნელოვანი ამ პარტიებმა? ასე რომ, საერთო ჯამში, აქაც ზუსტად ეს ახსნა აქვს. საერთოდ არ უმუშავიათ მოსახლეობასთან, საერთოდ არ მისულან არავისთან. ტელევიზორით ელაპარაკებოდნენ მთელს საქართველოს, მათ შორის, ტელევიზორით ელაპარაკებოდნენ ეთნიკური ჯგუფებით კომპაქტურად დასახლებულ ოლქებს, საერთოდ, წარმომადგენელი სიაშიც კი არ ჰყავდათ, რომ მათი ხმა ყოფილიყო და ვიღაცას აღექვა, როგორც საკუთარი წარმომადგენელი პარლამენტში და შემდეგ უკვირთ, რატომ არ აქვს მაღალი მხარდაჭერა ამა თუ იმ პირს. საჩხერის მაღალი მხარდაჭერა ტრადიციულია. ბოლნისს რაც შეეხება, იცით, რომ ჩვენი დელეგატი ამ შემთხვევაში იყო ბოლნისის მერი, რომელიც წლებია არის ბოლნისის მერი და ბოლნისის განვითარებას თუ შეხედავთ, მიხვდებით კიდევაც რატომ აქვს ასეთი მაღალი მხარდაჭერა მისი კანდიდატურის წყალობით „ქართულ ოცნებას“. მარნეულში ჩვენი დელეგატი იყო ზაურ დარგალი, რომელიც მოქმედი მაჟორიტარი არის და აქედან გამომდინარე, რა თქმა უნდა, მას განსაკუთრებული პატივისცემა აქვს რეგიონში. ლენტეხი, დმანისი, ყაზბეგი, ყველა ამ საკითხთან დაკავშირებით არის სინამდვილეში ძალიან მარტივი გასაგები რატომ დამარცხდა კატასტროფულად ოპოზიცია მთლიანად საქართველოში, რატომ დამარცხდა კატასტროფულად იმ რეგიონებში, რომლებმაც ვერც კი აღიქვეს, რომ მათი წარმომადგენელი უნდა ყოფილიყვნენ ისინი პარლამენტში. აქ, პარკეტზე დაზრდილებმა ჩათვალეს, რომ ალბათ უნდა ყოფილიყვნენ რეგიონების წარმომადგენლები. კიდევ ერთხელ გავიმეორებ, რომ ამ რეგიონებში, რომელზეც ისინი ამ ქსენოფობიურ კამპანიას ავრცელებენ, ყველაზე დაბალი იყო სინამდვილეში აქტივობა და მათ შორის, უფრო დაბალი, ვიდრე ეს იყო 2020 წელს. თუკი ფიქრობენ, რომ საქართველოში ხმის მიცემის ფარულობა დაირღვა და უნდა გაუქმდეს, მაშინ უნდა გაუქმდეს მოლდოვაშიც გუშინდელი საპრეზიდენტო არჩევნები. უნდა გაუქმდეს ლიეტუვაში ორი კვირის წინ ჩატარებული საპარლამენტო არჩევნები, პოლონეთში ჩატარებული საპარლამენტო არჩევნები, ბულგარეთის და ეს ოთხი მაგალითი, თორემ სხვა მილიონ მაგალითს მოგიყვანთ და დააკვირდით ამერიკის შეერთებულ შტატებში არჩევნები როგორ არის და იქაც დაინახავთ ამ სტანდარტით ფარულობის დარღვევას. ამომრჩეველთა მობილიზების წარმოჩენა, თითქოს ეს არის არათუ დარღვევა, არამედ რაიმე ისეთი რამ, რაც არ არის საერთაშორისო სტანდარტი პარტიის მუშაობისა, ეს არის აბსოლუტური ტყუილი. ხომ ხედავთ, ხუთი წუთი დასჭირდა და ორი სახელმძღვანელოს ამონარიდის ჩვენება იმისთვის, რომ ეს დიდი ფარსი გვემხილებინა და მათ შორის ის ფაშისტური კამპანია, რომელსაც სოცქსელში ახლა ზოგიერთი არასამთავრობო ორგანიზაციის წარმომადგენელი აწარმოებს. მაღალი მხარდაჭერის მიზეზები – ჩახედონ, სინამდვილეში ის კომპლექსური სქემა, რაზეც ისინი საუბრობდნენ არის ძალიან მარტივი. ამ სქემას ჰქვია დემოკრატია და ხალხის მხარდაჭერა. თუ ხალხი მხარს არ დაგიჭერს, თუ ხალხთან არ მიხვალ, რა თქმა უნდა, შენ იქ არ გექნება არანაირი შანსი, რომ გქონდეს კარგი შედეგები და მეორე, ამ არჩევნებზე, ნურავინ თავს ნუ იტყუებს და ნუ იმშვიდებს, განსაკუთრებით, ოპოზიციაში, ამ არჩევნებში ეს კატასტროფული მარცხი მათთვის ერთ რამეს ნიშნავს, რომ ქართველმა ხალხმა მათ მიუჩინა ის ადგილი, რომელსაც ისინი იმსახურებენ, მიუჩინა მოღალატეების და უსამშობლოების ადგილი და ამ ადგილას უნდა იყვნენ ისინი ქართველი ხალხის ვერდიქტით“, – განაცხადა შალვა პაპუაშვილმა.