უკრაინაში ომის დაწყების შემდეგ მოკლულია 7 ათასზე მეტი რუსი სამხედრო
უკრაინაში ომის დაწყების შემდეგ მოკლულია 7 ათასზე მეტი რუსი სამხედრო. ამის შესახებ ამერიკული დაზვერვის და თავდაცვის სამინისტროს წყაროებზე დაყრდნობით წერს გამოცემა The New York Times-ი.
ამერიკული გამოცემა ამ შეფასებას კონსერვატიულს უწოდებს. თუ ეს მონაცემები რეალურია, უკრაინაში რუსეთის არმიის ცოცხალი ძალის დანაკარგი უკვე აღემატება 20 წლის განმავლობაში, ერაყსა და ავღანეთში ამერიკული არმიის დანაკარგებს.
1994-1996 წლებში, ჩეჩნეთის პირველი ომის დროს, რუსეთის თავდაცვის სამინისტროს ოფიციალური მონაცემებით, დაიღუპა 4 ათასი სამხედრო მოსამსახურე. ორგანიზაცია “ჯარისკაცთა დედების კავშირი” 14 ათასს ასახელებდა.
უკრაინაზე თავდასხმის შემდეგ, 24 თებერვლიდან, რუსეთის თავდაცვის სამინისტრომ ოფიციალურად მხოლოდ ერთხელ, 3 მარტს გამოაცხადა, რომ დაღუპულია 498 სამხედრო მოსამსახურე. უკრაინამაც მხოლოდ ერთხელ, 12 მარტს განაცხადა, რომ რუსეთთან ომში დაიღუპა 1300-მდე სამხედრო.
უკრაინაში ომი უკვე მე-4 კვირაა რაც მიმდინარეობს . ადგილობრივი მედიის ცნობით, ოკუპანტებმა ღამით როვენის ოლქის ქალაქი სარნი დაბომბეს. რუსმა სამხედროებმა იერიში სამხედრო ინფრასტრუქტურაზე მიიტანეს.
უკრაინის შეიარაღებული ძალების გენშტაბი აცხადებს, რომ გუშინ რუსეთის ძალებმა შეტევის ვერც ერთ სტრატეგიულ მიზანს სრულად ვერ მიაღწიეს. მათივე ცნობით, რუსეთი კვლავ წარუმატებლად განაგრძობს ქალაქ იზუმის სამხრეთით წინსვლის მცდელობას.
CNN კი ავრცელებს თანამგზავრიდან გადაღებულ ფოტოებს, რომლებშიც დაბომბილი სუმი, ჩერნიგოვი და ხარკოვი ჩანს. კვლავ უცნობია მარიუპოლის დაბომბილ თეატრში ასობით ადამიანის მდგომარეობა. ქალაქის საბჭოს ცნობით, მარიუპოლი ზაპოროჟიეს მიმართულებით გუშინ 11-ი ათასმა ადამიანმა დატოვა.
უკრაინული მხარე დამატებით დეტალებს ავრცელებს, მელიტო-პოლის მერთან დაკავშირებით. ცნობილი ხდება, რომ ივან ფედოროვი ტყვეების გაცვლის შედეგად გაათავისუფლეს – მელიტო-პოლის მერი 2002-2003 წლებში დაბადებულ რუს სამხედროებში გაცვალეს.
