შავი ზღვის ფლოტის გემების ჯგუფმა 100 კილომეტრით რუსულ გემებს უკან დაახევინეს
უკრაინის საზღვაო ძალებში აცხადებენ, რომ რუსულ გემებს უკრაინის სანაპიროდან 100 კილომეტრით დაახევინეს უკან. აღნიშნულის შესახებ უკრაინის სამხედრო-საზღვაო ძალების მიერ სოციალურ ქსელში გამოქვეყნებულ ანგარიშშია ნათქვამი.
ამავე ინფორმაციის თანახმად, უკრაინელებმა რუსეთის ფლოტს სრული კონტროლი შავი ზღვის ჩრდილო-დასავლეთ ნაწილზე ჩამოართვა.
ანგარიშში აღნიშნულია, რომ მოწინააღმდეგის საზღვაო ძალების დასამარცხებლად განხორციელებული აქტიური ქმედებების შედეგად, რუსეთის ფედერაციის შავი ზღვის ფლოტის გემების ჯგუფმა უკრაინის სანაპიროდან 100 კილომეტრზე მეტი მანძილით დაიხია უკან. ანგარიშის მიხედვით, შავი ზღვის ჩრდილო-დასავლეთ ნაწილზე კონტროლის აღდგენის მცდელობისას, რუსეთი იძულებული გახდა, შეეცვალა ტაქტიკა, რის გამოც „ბალ“ და „ბასტიონის“ ტიპის სარაკეტო სისტემები ყირიმსა და ხერსონის რეგიონში განათავსეს და დამატებითი ძალები კუნძულ ზმეინიზე გადაისროლეს.
„ჩვენი აქტიური ქმედებების შედეგად, რომლებიც მიმართული იყო მტრის საზღვაო ძალების დამარცხებისკენ, რუსეთის შავი ზღვის ფლოტის გემების ჯგუფს უკრაინის სანაპიროებიდან უკან დავახევინეთ. ჩვენ ჩამოვართვით რუსეთის ფლოტს სრული კონტროლი შავი ზღვის ჩრდილო-დასავლეთ ნაწილზე. მოსკოვი ახლა მასზე კონტროლის აღდგენას ცდილობს“, – ნათქვამის სამინსიტროს განცხადებაში.
ამასთან, საზღვაო ძალებში აღნიშნავენ, რომ რუსეთმა, სავარაუდოდ, დიდი რაოდენობით თანამედროვე სარაკეტო იარაღი გამოიყენა და ახლა იძულებულია, მოძველებული ტიპის რაკეტები გამოიყენოს, რომელთა მარაგი საკმარისად აქვს უკრაინაზე დარტყმების განსახორციელებლად. საზღვაო ძალების მიხედვით, აღნიშნულიდან გამომდინარე ზღვიდან დარტყმების განხორციელების რისკი კვლავ მაღალია.
„ზღვიდან სარაკეტო დარტყმების საფრთხე რჩება. შემოჭრის დაწყებიდან მოწინააღმდეგის გემებმა და წყალქვეშა ნავებმა უკრაინის ტერიტორიის მიმართულებით 300-ზე მეტი ფრთოსანი რაკეტა გაუშვეს. ამჟამად „კალიბრის“ ტიპის ფრთოსანი რაკეტებით დარტყმის ინტენსივობა შემცირდა, ამავდროულად, მტერმა სამიზნეებზე დარტყმების განხორციელება გემსაწინააღმდეგო რაკეტებით დაიწყო, რომელთა მთავარი დანიშნულება სამხედრო გემების განადგურებაა“, – ნათქვამია ანგარიშში.
