ჰერეთის ინტერესებს GNCC-ს წინააღმდეგ საია დაიცავს

“საქართველოს ახალგაზრდა იურისტთა ასოციაცია” (საია) სამაუწყებლო კომპანია ჰერეთის ინტერესებს საქართველოს კომუნიკაციების ეროვნულ კომისიაში (GNCC) და ყველა ინსტანციის სასამართლოში დაიცავს.

საქმე ეხება 31 აგვისტოს კომისიაში გამართულ კონკურსს (ქ.ბათუმში კერძო საერთო რადიომაუწყებლობის ლიცენზიის მოსაპოვებლად), რომელიც კომისიის თავმჯდომარის კახი ბექაურის გადაწყვეტილბით ჩაიშალა და იმავე დღეს 15 საათზე ახალი კონკურსები გამოაცხადა. კონკურსში ორი კომპანია შპს “რადიოცენტრი პლიუსი”(რადიო პალიტრა) და შპს “სამაუწყებლო კომპანია ჰერეთი” ღებულობდნენ მონაწილეობას

აღნიშნული გადაწყვეტილებები საქართველოს კომუნიკაციების ეროვნულ კომისიას ამ დრომდე არ გამოუქვეყნებია ვებ-გვერდზე და არც კონკურსანტებისთვის მიუწოდებია. რადიო ჰერეთის ინფორმაციით,კომისიის თავმჯდომარე კახი ბექაური შვებულებაშია და გადაწყვეტილებების გამოქვეყნება ამ მიზეზით ჭიანურდება.

სამაუწყებლო კომპანია ჰერეთი აღნიშნული გადაწყვეტილებების გასაჩივრებას აპირებს, კომპანიის დამფუძნებლის რამაზ სამხარაძის თქმით, კომისია ხელოვნურ ბარიერებს უქმნის დამუკიდებელ კომპანიას ლიცენზიის მოსაპოვებლად, რადგან სასამართლოში საქმისწარმოების დასაწყებად საჭიროა იმ გადაწყვეტილებების ნახვა, რომელიც კომისიამ 31 აგვისტოს მიიღო.

“კომისია შეგნებულად აჭიანურებს ორივე მედიაკომპანიისთვის ლიცენზიის მიღებას, ამ დრომდე არ დევს გადაწყვეტილებები ვებ-გვერდზე და არც მხარეებს ჩაგვბარებია. გარდა ამისა, კომისიამ შექმნა არაჯანსაღი გარემო, კომისიის ეს გადაწყვეტილება პალიტრა ჰოლდინგსაც შეუქმნის პრობლემებს ბათუმში მაუწყებლობაზე, რადგან ყველა ახალი კონკურსი ავტომატურად შეჩერდება სანამ ჩვენი ამბავი არ გაირკვევა. სამწუხაროდ, კომისია იგივე მეთოდებით ცდილობს მაუწყებლებთან ურთიერთობას, როგორც ამ კომისიის ძველი შემადგენლობა. ამ გადაწყვეტილებით გამოჩნდა, რომ კომისიის თავმჯდომარე და წევრები ბოროტად სარგებლობენ თავიანთი პოზიციებით, ამის გარდა მათ შესაბამისი კვალიფიკაციაც არ ჰყოფნით ობიექტური გადაწყვეტილებების მისაღებად”- განაცხადა რამაზ სამხარაძემ.

კომისიის თავმჯდომარემ, კახი ბექაურმა, 31 აგვისტოს განაცხადა, რომ მისი პირადი შეცდომა იყო აღნიშნული კონკურსის ამ სახით გამოცხადება, რადგან არათანაბარ პირობებში ჩააყენა ორი წარმატებული მაუწყებელი. მან განაცხადა, რომ კარგი იქნებოდა რეგიონული კონტენტისთვის ცალკე კონკურსი გამოცხადებულიყო და ცენტრიდან გავრცობილი სიგნალისთვის ცალკე.

კენჭისყრაზე, რომელსაც კომისიის 5 წევრიდან 4 ესწრებობა (კომისიის თავმჯდომარემ განაცხადა, რომ კომისიის კიდევ ერთი წევრი გიორგი ფრუიძე შვებულებაში იყო) ხმები გაიყო პალიტრას მხარი დაუჭირა მერაბ ქათამაძემ და ვატო აბაშიძემ, წინააღმდეგი წავიდა კახი ბექაური და ელისო ასანიძე, ხოლო ჰერეთის კენჭისყრის დროს კომპანიას მხარი დაუჭირეს ელისო ასანიძემ და მერაბ ქათამაძემ, წინააღმდეგი წავიდა ვატო აბაშიძე და კახი ბექაური, რომლის ხმაც კომისიის წესების მიხედვით გადამწყვეტია.

სამაუწყებლო კომპანია ჰერეთის დამფუძნებელმა და დირექტორმა რამაზ სამხარაძემ კომისიის წევრებს განუცხადა, რომ ეს იყო არაობიექტური გადაწყვეტილება.

“პატივცემულო კომისიის წევრებო, თქვენ გაქვთ შესაბამისი პოზიციები და ანაზღაურება იმისთვის, რომ თქვენ თავიდანვე უნდა გაგეთვალისწინებინათ ის ფაქტორები, რა შედეგიც შესაძლოა დამდგარიყო. მეორეც, თქვენ გაქვთ ჩატარებული კვლევა, რომელიც კონკურსს დაედო საფუძვლად, სადაც რადიომსმენელის 56,7 % ადგილობრივი რადიოსადგურის აუცილებლობაზე საუბრობს ჰერეთის კონცეფცია პირდაპირ ერგებოდა კონკურსის პირობებსა და კვლევას. ჰერეთი აღნიშნულ გადაწყვეტილებას გაასაჩივრებს ”

არასამთავრობო ორგანიზაციების კვლევებით და დეკლარაციებით, რომელიც კომისიონერებს სხვადასხვა წლებში აქვთ შევსებული, კომისიის წევრის ყოველთვიური ხელფასი 14-20 ათას ლარამდე მერყეობს. კომისია არის დამოუკიდებელი ორგანო, რომლის წევრებს პრეზიდენტის წარდგენით, საქართველოს პარლამენტი ამტკიცებს.

კომისიის ვებ-გვერდზე  ნათქვამია:კომისიის საქმიანობის ერთ-ერთი ძირითადი  პრინციპია საზოგადოებასთან ღია, გამჭვირვალე ურთიერთობა. კომისიის დადგენილებები და გადაწყვეტილებები ხელმისაწვდომია საჯარო განხილვისათვის.

 

 

მსგავსი პოსტები

Back to top button