მნიშვნელოვანისიახლეები

საბიუჯეტო თანხების ჯგუფურად გაფლანგვის საქმეზე მესამე პრეზიდენტის სასამართლო პროცესი გადაიდო

სააკაშვილის სასამართლო პროცესი 21 თებერვალს გაიმართება

დიდი ოდენობით საბიუჯეტო თანხების ჯგუფურად გაფლანგვის საქმეზე მიხეილ სააკაშვილის სასამართლო პროცესი გადაიდო. სხდომას დისტანციურად ჯანმრთელობის მდგომარეობის არგუმენტით ექსპრეზიდენტი დღეს არ ჩაერთო.
როგორც სხდომის დაწყების წინ მოსამართლე ბადრი კოჭლამაზაშვილმა განაცხადა, სააკაშვილს შესთავაზეს პროცესში მონაწილეობის მიღება დისტანციური ფორმით ან დარბაზში დასწრების სახით, რაზეც სააკაშვილმა უარი განაცხადა.

„სასამართლოსთვის წარმოდგენილია პენიტენციური დეპარტამენტის მიერ შედგენილი ოქმი, რომლის მიხედვით, ირკვევა, რომ პენიტენციური დეპარტამენტის ესკორტის ოფიცრებმა მსჯავრდებულს შესთავაზეს დღევანდელ სასამართლო პროცესზე დასწრება ან დისტანციურად ჩართვა, რაზეც მსჯავრდებულმა უარი განაცხადა. მისივე განმარტებით, უარის მიზეზად დასახელებულია ჯანმრთელობის მდგომარეობა“, – განაცხადა ბადრი კოჭლამაზაშვილმა.
ვინაიდან ოქმში არ იყო მითითებული, ბრალდებულს სურდა თუ არა მის გარეშე გაგრძელებულიყო განხილვა, პროკურორებმა სხდომის გადადების შუამდგომლობა დააყენეს.
„გამოცხადებული მოწმის დაკითხვაზე ორივე მხარე უნდა იყოს თანახმა. ერთი მხარე თუ წინააღმდეგია და მეორე ითხოვს დაკითხვას, ასეთ დროს მოწმე ვერ დაიკითხება. ეს გაუგებრობა აღმოვფხვრათ იმით, რომ უზრუნველყოფილი იყოს ბრალდებულის პროცესში უშუალო მონაწილეობა ან მისი ნება იყოს მკაფიოდ გარკვეული. ყოველგვარი გაუგებრობის თავიდან ასაცილებლად დღევანდელი სხდომა გადავდოთ და გამოცხადებული მოწმე შემდეგ პროცესზე დავკითხოთ. შემდეგი სხდომა გაიმართება 21 თებერვალს, 11:00 საათზე. დღევანდელი სხდომა ამით დასრულებულია“, – განაცხადა მოსამართლე ბადრი კოჭლამაზაშვილმა.

მოთხოვნას არ დაეთანხმა დაცვის მხარე. ადვოკატების განმარტებით, სააკაშვილი თანახმა იყო სხდომა მისი მონაწილეობის გარეშე გაგრძელებულიყო. აღნიშნულის მიუხედავად, მოსამართლემ სხდომა 21 თებერვლამდე გადადო.

“მიგვაჩნია, რომ დღევანდელ პროცესზე თეიმურაზ მღებრიშვილის დაკითხვის შესაძლებლობა უნდა გქონოდა და სასამართლომ ამ ნაწილში მაქსიმუმი გააკეთა, თუმცა ბრალდების მხარის პოზიცია გახდა მიზეზი იმის, რომ დღევანდელი პროცესი გადაიდო. უნდა ყოფილიყო გაზიარებული ჩვენი განცხადება, რომ მიხეილ სააკაშვილი თანახმაა მისი დასწრების გარეშე დღეს თეიმურაზ მღებრიშვილი დაგვეკითხა,” – აცხადებს ადვოკატი, ბექა ბასილაია.

დღევანდელ სხდომაზე სახელმწიფო დაცვის სპეციალური დაცვის ყოფილი უფროსი თემურ მღებრიშვილი უნდა დაეკითხათ.

“პირადი ხარჯების გაწევის შესახებ მსგავსი ბრძანება არასდროს არ მიმიღია. ჩემ ხელმძღვანელად ყოფნის პერიოდში მე მსგავსი დოკუმენტი არ გამიცია. კანონის შესაბამისად, თუ რამეა გასაკეთებელი, ეს არის კანონის შესაბამისად,” – აცხადებს თემურ მღებრიშვილი.

ცნობისთვის საქმეზე, მიხეილ სააკაშვილთან ერთად ბრალდებულია სახელმწიფო დაცვის სპეციალური სამსახურის ყოფილი უფროსი თეიმურაზ ჯანაშიაც. პროკურატურა ბრალდებულებს 9 მილიონი ლარის ჯგუფურად გაფლანგვას ედავება.

კლინიკა „ვივამედის” კლინიკური დირექტორის, ზურაბ ჩხაიძის ინფორმაციით, საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობა სტაბილურია.

როგორც მან განაცხადა, მიხეილ სააკაშვილს ჯანმრთელობის მდგომარეობის განმსაზღვრელი რაიმე პარამეტრის გაუარესება არ აღენიშნება, კვების კომპონენტი კი გაფართოებულია.

„პაციენტის მდგომარეობა სტაბილურია, თუმცა აღნიშნავს გარკვეულ ჩივილებს. ეს საჯარო ინფორმაცია არ არის, სუბიექტური ჩივილებია და ყურადღებას საჭიროებს. სხვა პარამეტრის გაუარესება არ აღენიშნება. კვების კომპონენტი სრულყოფილი არ არის, მაგრამ კალორაჟი გაფართოებული, მომატებულია“,- აღნიშნა ჩხაიძემ.

“დღევანდელი სხდომის გადადება ემსახურება პროცესების ხელოვნურ გაჭიანურებას და ეს ბრძანება მოდის ზემოდან”, – ამის შესახებ საქართველოს მესამე პრეზიდენტი მიხეილ სააკაშვილი სოციალურ ქსელში წერს და გადადებულ პროცესს ეხმაურება.

დღევანდელი სხდომის გადადება ემსახურება პროცესების ხელოვნურ გაჭიანურებას და ეს ბრძანება მოდის ზემოდან.

მიუხედავად ჩემი თანხმობისა, რომ სხდომა ჩემს გარეშე გაგრძელებულიყო, პროკურატურა “ჩემი ინტერესების მცველად” მოგვევლინა, თითქოს ჩემს ადვოკატებზე მეტად იზრუნეს ჩემზე და სხდომა გადადეს.

საქმეები, რომელზეც მასამართლებენ, რომ სრულიად შეთითხნილია, ამაზე ყველა თანხმდება.
განსაკუთრებით -ე.წ. “პიჯაკების საქმე”.

მათივე ხელმოწერილი ანალოგიური ხარჯები და შესაბამისი ბრძანებები ვადის გასვლის მიუხედავად კვლავ საიდუმლო გრიფით აქვთ დაცული, რომ პირდაპირ არ ჩაუფლავდეთ ეს აბსურდი!, – წერს მიხეილ სააკაშვილი.

ცნობისთვის საქართველოს ყოფილმა პრეზიდენტმა, მიხეილ სააკაშვილმა განაცხადა, რომ ჯანმრთელობის მდგომარეობის გამო დღევანდელ სასამართლო პროცესში მონაწილეობას ვერ მიიღებდა.

მსგავსი პოსტები

Back to top button