საქართველომ “ჯაველინები” მიიღო
“ჯაველინების სისტემის შეძენის პირველი ეტაპი წარმატებით დასრულდა. „ჯაველინების“ სისტემა უსაფრთხო ადგილას არის განთავსებული”, – ამის შესახებ საქართველოს თავდაცვის მინისტრმა აშშ-ის ელჩთან შეხვედრის შემდეგ განაცხადა.
ლევან იზორიას თქმით, ახლო მომავალში დაიწყება მომზადება, რათა ქართველმა სამხედრო მოსამსახურეებმა იმ უნარების დაუფლება შეძლონ, რაც ამ სისტემის გამოყენებისთვის არის აუცილებელი.
თავდაცვის სამინისტროს ინფორმაციით, აშშ-ის ელჩთან შეხვედრისას საუბარი იყო ასევე საქართველოს თავდაცვის მზადყოფნის პროგრამის ამოქმედებასა და მომავალი თანამშრომლობის პერსპექტივებზე.
ამერიკული ჯავშანსაწინააღმდეგო სარაკეტო კომპლექსი „ჯაველინი“, რომელსაც მისი მწარმოებელი Raytheon/Lockheed Martin Javelin Joint Venture მსოფლიოს ყველაზე მძლავრ გადასატან ჯავშანსაწინააღმდეგო სისტემად მოიხსენიებს, ფართოდ გამოიყენება აშშ-ის არმიის და საზღვაო ქვეითების მიერ.
ვიდეო თავდაცვის სამინისტრომ გაავრცელა ►