გურჯაანში მომხდარი წყალდიდობის გამო “ენმ”ს ლიდერი ხელისუფლებას თანხის გამოყოფისკენ მოუწოდებს
გურჯაანში მომხდარი წყალდიდობის გამო, ერთიანი ნაციონალური მოძრაობის ლიდერი, ხელისუფლებას სარეზერვო ფონდიდან თანხის გამოყოფისკენ მოუწოდებს.
განცხადება ლევან ხაბეიშვილმა, ცოტა ხნის წინ, გურჯაანში გააკეთა.
პარტიის ლიდერი მუნიციპალიტეტში მაღალი თანამდებობის პირების ჩასვლასაც ითხოვს.
“უმძიმესი მდგომარეობაა გურჯაანში, დატბორილია ცენტრალური ნაწილი. რაიონში დაზარალდა მოსახლეობა, მათ შორის სეტყვამ ფაქტობრივად გურჯაანის დიდ ნაწილს შეუქმნა პრობლემა. სასწრაფოდ უნდა მოხდეს ხელისუფლების მაღალი თანამდებობის პირების ჩამოსვლა ადგილზე, სწრაფად დათვლა ზარალის, სარეზერვო ფონდებიდან გამოიყოს თანხა, უნდა მოწესრიგდეს სწრაფად ინფრასტრუქტურა. გურჯაანის მერია ვერ ეყოფა ამ საქმეს, ამ საქმეს ჭირდება ხელისუფლება, ყველას მობილიზება. ჩვენ ჩამოვედით ადგილზე და მზად ვართ ფიზიკურადაც დავეხმაროთ გაწმენდით სამუშაოებში, მიუხედავად იმისა, რომ მათი პირადი ვალდებულებაა. ხვალ დილიდან მე პირად კონტროლზე ავიყვან ამ საქმეს, სწრაფად უნდა მოხდეს ზარალის დათვლა და მოსახლეობის მოთხოვნების სრულად დაკმაყოფილება, მათ შორის კომერციულ ფართებში შევიდა წყალი, დატბორილია ბაზარი, სახლები, ავტომობილები, რომელიც წყალმა წაიღო. წაიღო გზა და ინფრასტრუქტურა გურჯაანში და ამიტომ უმნიშვნელოვანესია მაღალი თანამდებობის პირების, მათ შორის პრემიერ მინისტრად წოდებული კაცის ჩართულობა, ბიუჯეტზე მათ მიუწვდებათ ხელი, სარეზერვო ფონდებზე მათ მიუწვდებათ ხელი-” განაცხადა ხაბეიშვილმა.
დღეს საღამოს, გურჯაანში ძლიერმა წვიმამ და სეტყვამ მუნიციპალიტეტის რამდენიმე სოფელი დააზიანა.
ხევებში ადიდებული წყალი ქუჩებში გადავიდა, წაიღო ავტომობილები, დატბორა ეზოები და საცხოვრებელი სახლები.
