შეხვედრა სანქტ-პეტერბურგში-რუსეთის პრეზიდენტი ბელარუს კოლეგას შეხვდება
რუსეთის პრეზიდენტი, ვლადიმერ პუტინი დღეს ბელარუს კოლეგას, ალექსანდრე ლუკაშენკოს შეხვდება.
მედიის ინფორმაციით, შეხვედრა სანქტ-პეტერბურგში გაიმართება.
ორი დღის წინ, ვლადიმერ პუტინმა უშიშროების საბჭოს მუდმივ წევრებთან შეხვედრაზე განაცხადა, რომ პოლონეთის ლიდერებს, სავარაუდოდ, “ნატოს ქოლგის” ქვეშ რაიმე სახის კოალიციის შექმნის იმედი აქვთ, რათა უშუალოდ ჩაერიონ უკრაინის კონფლიქტში და თავისთვის უკრაინის კარგი ნაწილი მიიტაცონ.
პუტინის მტკიცებით, ისინი ბელარუსის მიწებზეც ოცნებობენ.
რუსეთის პრეზიდენტის განცხადებით, უკრაინის რეჟიმის პოლიტიკა მათი საქმეა და რუსეთი არ ჩაერევა. რაც შეეხება ბელარუსს, ის საკავშირო სახელმწიფოს ნაწილია და მის წინააღმდეგ აგრესია ნიშნავს რუსეთის ფედერაციის წინააღმდეგ აგრესიას.
„ჩვენ ვუპასუხებთ ჩვენს ხელთ არსებული ყველა საშუალებით“, – აღნიშნა პუტინმა.
პუტინთან შესახვედრად უკვე ალიაქსანდრ ლუკაშენკა სანქტ-პეტერბურგში ჩავიდა. ამის შესახებ ბელარუსის ავტორიტარი ლიდერის პრესსამსახურთან დაახლოებული ტელეგრამის არხი იტყობინება. ლუკაშენკას პულკოვოს აეროპორტში დახვდნენ პეტერბურგის გუბერნატორი ალექსანდრ ბეგლოვი და ლენინგრადის ოლქის ხელმძღვანელი ალექსანდრ დროზდენკო.
კვირას დაგეგმილია ლუკაშენკას მოლაპარაკებები რუსეთის პრეზიდენტ ვლადიმირ პუტინთან. ოფიციალური მონაცემებით, მხარეები გეგმავენ უსაფრთხოების საკითხებისა და საერთაშორისო დღის წესრიგის განხილვას, ასევე „სამოკავშირეო სახელმწიფოს ფარგლებში ინტეგრაციულ თანამშრომლობაზე“ მსჯელობას.
ეს იქნება პუტინსა და ლუკაშენკას შორის პირველი შეხვედრა კერძო სამხედრო კომპანია „ვაგნერის“ აჯანყებისა და შემდგომ, მინსკთან შეთანხმებით, დაჯგუფების დაქირავებული ჯარისკაცების ბელარუსის ტერიტორიაზე გადაადგილების შემდეგ.
რუსეთში გამგზავრებამდე ლუკაშენკამ სრულიად ბელარუსის ეროვნულ ასამბლეას მისცა უფლებამოსილება, დაამტკიცოს სამხედრო დოქტრინა, რესპუბლიკაში შემოიღოს საგანგებო მდგომარეობა და საომარი მდგომარეობა და სამხედრო მოსამსახურეები ქვეყნის გარეთ გაგზავნოს.
21 ივლისს უშიშროების საბჭოს წევრებთან შეხვედრაზე ვლადიმირ პუტინმა განაცხადა, რომ მინსკის წინააღმდეგ აგრესია მოსკოვის წინააღმდეგ აგრესიას ნიშნავს. ამასთან, რუსეთის პრეზიდენტმა პოლონეთი ბელარუსის მიმართ ტერიტორიულ პრეტენზიებში დაადანაშაულა. პუტინმა ასევე განაცხადა, რომ პოლონეთი დასავლეთ უკრაინაზე აცხადებს პრეტენზიას.
სრულიად ბელარუსის სახალხო კრება არის ბელარუსის მთავრობისა და ხელისუფლების სხვა შტოების წარმომადგენლების, საწარმოების ხელმძღვანელებისა და წარმომადგენლების, მეცნიერებისა და კულტურის მოღვაწეების საერთო კრება.
ალიაქსანდრ ლუკაშენკას რეჟიმი უკრაინის წინააღმდეგ მეომარი რუსეთის ერთ-ერთ მთავარ მოკავშირედ ითვლება. ლუკაშენკამ არ გაგზავნა ჯარები უკრაინის წინააღმდეგ ომში, მაგრამ მოსკოვს უფლება მისცა, ქვეყნის ტერიტორია სრულმასშტაბიანი შეჭრის დასაწყებად გამოეყენებინა.
მინსკმა ასევე დაუშვა ქვეყანაში რუსული ბირთვული იარაღის განლაგება. რუსეთის პრეზიდენტის თქმით, ის უკვე ბელარუსის ტერიტორიაზეა. ამ ინფორმაციას ადასტურებს აშშ-ის თავდაცვის სამინისტრო სადაზვერვო სამმართველოც.
