მნიშვნელოვანისაქართველოსიახლეები

“სანოტარო საქმიანობა პოლიტიკური ნიშნით შემიჩერეს”

ბაჩანა შენგელია იუსტიციის სამინისტროს, მისთვის პოლიტიკური ნიშნით სანოტარო საქმიანობის შეწყვეტაში ადანაშაულებს. მისი განმარტებით, ეს არის უპრეცედენტო კანონდარღვევა, სისხლის სამართლის დანაშაული, რადგან მუშაობა ყოველგვარი სამართლებრივი საფუძვლის გარეშე შეუზღუდეს. კერძოდ, 19 ივნისს ქსელიდან გამორთეს პროგრამა, რომლის მეშვეობითაც მუშაობდა, დისციპლინური წარმოება მის წინააღმდეგ კი, მხოლოდ სამი დღის შემდეგ დაიწყეს.

“ეს ფორმალურად ეხება იმას, რომ ჩემი ავადმყოფობის გამო, შემცვლელი პირი მყავდა დანიშნული. ამას კანონი ითვალისწინებს. წელიწადში 30 დღის განმავლობაში, ნოტარიუსს შეუძლია დანიშნოს თავისი შემცვლელი პირი. ფორმალურად, ამას მედავებიან.” – უთხრა ბაჩანა შენგელიამ “ლაივპრესს”.

ნოტარიუსის თქმით, გადაწყვეტილება იმ პოლიტიკური დევნის გაგრძელებაა, რაც ჯერ კიდევ პრეზიდენტის არჩევნების მეორე ტურის წინ, დედამისის, მეექვსე საჯარო სკოლის ყოფილი დირექტორის, ია კერზაიას მიმართ დაიწყო.

ამჯერად, ბაჩანა შენგელია ამბობს, რომ ხელისუფლებამ უკვე თეა წულუკიანის სახით გადაწყვიტა პირადად მასზე ანგარიშსწორება, რისთვისაც იუსტიციის სამინისტრომ “ძალადობრივ მეთოდს” მიმართა.

“აღნიშნულ დევნას მე ვუკავშირებ ჩემს აქტივობას ხელისუფლების მიერ ჩადენილი იმ დანაშაულის წინააღმდეგ, რაც ჩემი ოჯახის მიმართ განხორციელდა. ასევე, არ გამოვრიცხავ პირდაპირ კავშირს ჩემს მიერ სტრასბურგის სასამართლოში გაგზავნილ სარჩელთან ან/და მოახლოებულ საპარლამენტო არჩევნებთან.” – განმარტა მან.

ბაჩანა შენგელია გენერალურ პროკურატურას მიმართავს, დაიწყოს გამოძიება სისხლის სამართლის კოდექსის 333-ე მუხლით, საქართველოს იუსტიციის სამინისტროს მოხელეების მიერ სამსახურეობრივი უფლებამოსილების გადამეტების ფაქტზე.

ნოტარიუსმა ასევე მოუწოდა სახალხო დამცველს და საქართველოში მოქმედ უფლებადამცველ არასამთავრობო ორგანიზაციებს, ფაქტი შეისწავლონ და მოახდინონ შესაბამისი რეაგირება.

ბაჩანა შენგელიას თემას პარლამენტში მყოფი იუსტიციის მინისტრი თეა წულუუკიანი გამოეხმაურა. მან აღნიშნულ საკითხთან დაკავშირებით, ოპოზიციის მიერ დასმულ კითხვას უპასუხა. თეა წულუკიანის თქმით, ნოტარიატის შესახებ კანონით, პოლიტიკურ საქმიანობაში ნოტარიუსის ჩარევა აკრძალულია. მან ოპოზიციას მოუწოდა, ნუ “აპოლიტიზებს” თემას და ნუ აფიქრებინებს, რომ “ეს ადამიანი მთლად პოლიტიკურად ნეიტრალური არ არის”.

“სახელმწიფოებრივი უფლებამოსილებების განხორციელებისას, იქვე წერია კანონმდებლობაში, აკრძალულია ნოტარიუსის რაიმე ტიპის ჩარევა პოლიტიკურ საქმიანობაში. ამიტომ, დაანებოთ იქნებ ნოტარიუსებს თავი, მათ შორის ამ ადამიანს. კოვიდის და პანდემიის პირობებში მოქმედებს ყველა ნოტარიუსისადმი დროებითი წესები და ნებისმიერ ნოტარიუსს, იქნება ეს თუ ის, თუ ინპექტირებისას აღმოჩნდა, რომ დაარღვია წესი, შეუჩერდება დროებით ბიუროს საქმიანობის უფლება. ნუ აპოლიტიზებთ ამ თემას და ნუ მაფიქრებინებთ, საზოგადოებას ნუ აფიქრებინებთ, რომ ეს ადამიანი მთლად პოლიტიკურად ნეიტრალური არ არის და თქვენი აქტივისტია.” — თქვა მან.

წულუკიანმა ასევე აღნიშნა, რომ “ეს ფორმატი”, ანუ მთავრობის ერთი წლის ანგარიში, კონკრეტულ ქეისებზე სასაუბროდ არ არის და როცა პარლამენტში მინისტრის საათის ფარგლებში თვითონ წარსდგება, საქმეებზე დეტალურად მაშინ ისაუბრებს.

“არ მგონია, რომ ეს ფორმატი იმისთვისაა, რომ თქვენ განგახილინოთ აქ იუსტიციის სამინისტროს რომელიმე საკადრო გადაწყვეტილება ან რაიმე სახდელის დაკისრება ვინმეზე. როცა წარვსდგები, უფრო მწვავე ან უფრო მშვიდ ტონში შეგვიძლია განვიხილოთ.” — თქვა წულუკიანმა.

როგორც მან აღნიშნა, მინისტრის საათის ფარგლებში, პარლამენტის წინაშე არჩევნებამდე წარსდგება.

მსგავსი პოსტები

Back to top button