მსოფლიოსიახლეები

“აღდგომის დღესასწაულზე შეკრებილებს კარანტინი ემუქრებათ”

აშშ-ის შტატ კენტუკის გუბერნატორის, ენდი ბიშერის განცხადებით, ყველას, ვინც აღდგომის დღესასწაულზე შეკრებებში მონაწილეობას მიიღებს და ხელისუფლების მიერ სახლში დარჩენის ბრძანებას დაარღვევს, სავალდებულო 14-დღიანი კარანტინის გავლა მოუწევს. ინფორმაციას ამის შესახებ NBC NEWS ავრცელებს.

როგორც NBC იუწყება, ბიშერმა განაცხადა, რომ მასობრივ შეკრებაზე შემჩნეული ადამიანების მანქანების სახელმწიფო ნომერს შტატი ჩაიწერს და ადგილობრივ ჯანდაცვის ორგანოებს გადასცემს, რის შემდეგაც დამრღვევებს კარანტინში ყოფნის ბრძანებას პირადად გადასცემენ.

„იმედი მაქვს, ყველამ იცის, რომ ასეთ დღეებშიც კი არ შეიძლება გვქონდეს ნებისმიერი ტიპის შეკრებები“, — განაცხადა გუბერნატორმა. „არავითარ შემთხვევაში არ შეიძლება ხალხი ერთ შენობაში შეიკრიბოს, რადგანაც ასე ვრცელდება კორონავირუსი და ასე იღუპებიან ადამიანები“, — დაამატა ბიშერმა. მისი თქმით, შტატის მასშტაბით, სულ ცოტა 7 ეკლესია მაინც აპირებს სააღდგომო მსახურება ჩაატაროს.

როგორც NBC NEWS წერს, კენტუკის შტატში ამჟამად კორონავირუსით დაავადების 1 693 შემთხვევაა დადასტურებული, აქედან 90 ადამიანი გარდაიცვალა.

აშშ-ის შტატების უმრავლესობაში ადგილობრივმა ხელისუფლებებმა მოქალაქეებს სახლში დარჩენისკენ მოუწოდეს ან შესაბამისი ბრძანება გასცეს. დახურულია ყველა ობიექტი, გარდა სასიცოცხლოდ აუცილებლებისა (სასურსათო მაღაზიები და ა.შ).

worldmeters.info-ს მონაცემებით, ამ მომენტისთვის, მთლიანად აშშ-ში კორონავირუსით 503 177 ადამიანია დაავადებული. აქედან გარდაიცვალა 18 761 ადამიანი, ხოლო გამოჯანმრთელდა 27 314.

მსგავსი პოსტები

Back to top button