დაპირისპირება და ხმაური ზუგდიდში-რას ითხოვენ მოვაჭრეები
ზუგდიდში ცენტრალურ ბაზართან, კედიას ქუჩაზე მომუშავე გარემოვაჭრეები მუშაობის უფლებას ითხოვენ. როგორც ისინი აცხადებენ, მათ მერიის ზედამხედველობის სამსახური დახლების გაშლის უფლბას არ აძლევს.
გარემოვაჭრეების თქმით, მერია მხოლოდ მათ უკრძალავს გარევაჭრობას, ხოლო ბაზრის გარეთ, სხვა პერიმეტრზე მოვაჭრეები ადგილზე რჩებიან.
გარემოვაჭრეების გაფრთხილების პროცესს ადგილზე დაპირისპირება და ხმაური მოჰყვა, რა დროსაც ერთ-ერთი მოვაჭრისთვის სასწრაფო ბრიგადის გამოძახება გახდა საჭირო.
პარალელურად აქცია გამართეს ბაზრის შიდა ტერიტორიაზე მოვაჭრეებმა, რომლებმაც გარევაჭრობის აკრძალვის მოთხოვნით გზა გადაკეტეს.
ადგილზე მობილიზებულია პოლიცია, ცენტრალური გზა რამდენიმე წუთის განმავლობაში პარალიზებული იყო, თუმცა, სამართალდამცავებმა აქციის მონაწილეები გზიდან გაიყვანეს და მხოლოდ ამის შემდეგ მიეცა ავტომანქანებს გადაადგილების შესაძლებლობა.
