ავზის მოცულობაზე მეტი საწვავი და სასმელად უვარგისი წყალი- რა დარღვევები გამოავლინა აუდიტის სამსახურმა თელავის მერიაში

სახელმწიფო აუდიტის მიერ გამოქვეყნებული ანგარიშის მიხედვით, თელავის მუნიციპალიტეტის მერიაში, ავტომობილის ავზის მოცულობაზე გადაჭარბებით, საწვავის ჩასხმის 61 შემთხვევა გამოვლინდა.

შესაბამისი დოკუმენტაციის შესწავლის შემდეგ დადგინდა, რომ 5 ავტომობილი ავზის მოცულობაზე მეტ საწვავს, 2018- 2019 წლებში ასხამდა.

” ავტომანქანებზე ჯამურად ჩასხმულია 4435 ლიტრი საწვავი. ავზის მოცულობაზე მეტი საწვავის ჩასხმა შესაძლებელია იმ შემთხვევაში, თუ მაკონტროლებელი “ჩიპი”მოხსნილია და მიმაგრებულია სხვა ავტომობილის ავზზე, ან სხვა სახის რეზერვაურზე”- ნათქვამია სახელმწიფო აუდიტის დასკვნაში.
თელავის მუნიციპალიტეტის მერიის აუდიტის სამსახურის უფროსი, თინათინ არაბული, რადიო ჰერეთთან განმარტავს, რომ კონკრეტული დარღვევა სატრანსორტო მონაცემებში დაშვებულმა შეცდომამ განაპირობა.

” ეს ფაქტები დაფიქსირდა შეცდომის გამო, რაც ავტომანქანის ავზის ტევადობის თაობაზე იყო დაშვებული. ერთ- ერთი ავტომობილი, რომელზეც საუბარია, ემსახურება სამხედრო აღრიცხვის სამსახურს. სიმადვილეში მისი ავზის მოცულობა მეტია, რაც სწორად არ იყო ასახული მონაცემებში. ჩვენ ახლა გამოვითხოვეთ შესაბამისი ინფორმაცია, რომ ამ მოდელის მანქანებს ავზი, სინამდვილეში ბევრად დიდი აქვს და მონაცემებს სწორად ავსახავთ”- განაცხადა არაბულმა.

მნიშვნელოვანი დარღვევები გამოავლინა სახელმწიფო აუდიტმა, სასმელი წყლის სიტემებისა და რეაბილიტაცია- ექსპლოატაციის საკითხებში.

დოკუმენტების მიხედვით ირკვევა, რომ ამ მიმართულებით, თელავის მუნიციპალიტეტის მერიამ, 2018- 2019 წლებში 3, 872.2 ათასი ლარი დახარჯა. აუდიტის დასკვნის თანახმად, თელავის მუნიციპალიტეტის 26 სოფელში მცხოვრებ, 15, 793 ოჯახს, არალიცენზირებული ორგანიზაციები ემსახურებიან.

” 26 სოფლის მოსახლეობის წყალმომარაგების გამართულ ფუნქციონირებაზე პასუხისმგებელია შპს ” თელავის მუნიციპალიტეტის კეთილმოწყობის სამსახური” და შპს “აქვა- ენერჯი”, რომლებიც კანონით განსაზღვრულ ლიცენზიებს არ ფლობენ. შესწავლით დადგენილია, რომ სოფლებში, წყლის სისტემებზე, არ არის მოწყობილი წყლის გამწმებდი ნაგებობები, არ ხორციედება წყლის დაქლორვა და მოსახლეობას მიეწოდება ტექნიკური წყალი. წყალი ლაბორატორიულად მოწმდება მხოლოდ ახალი ჭაბურღილის მოწყობის დროს, რაც იმას ნიშნავს, რომ წყლის უსაფრთხოება დადასტურებული არ არის.იყო შემთხვევები, როცა საბავშვო ბაღებისათვის მიწოდებული წყალი არ შეესაბამებოდა სტანდარტს”- ნათქვამია დასკვნაში.

თელავის მუნიციპალიტეტის მერიაში, აუდიტის დასკვნაში მითითებულ გარემოებებს, ფაქტობრივად ადასტურებენ.

შპს ” კეთილმოწყობის სამსახურის” უფროსის, პეტრე ჯავახიშვილის განმარტებით, ორგანიზაციას მხოლოდ სასმელი წყლის სისტემების მოვლა- პატრონობა ევალება.

” სატენდერო პირობების მიხედვით, ჩვენ მხოლოდ წყლის სისტემას უნდა მივხედოთ. უშუალოდ წყლის ხარისხის კონტროლი, მრიცხველების მონტაჟი, ან ჭაბურღილების მიხედვა არ გვვევალება”- განაცხადა ჯავახიშვილმა.

თელავის მუნიციპალიტეტის ინფრასტრუქტურის განყოფილების უფროსი, დავით ქსოვრელიშვილი ადასტურებს, რომ მომსახურე ორგანიზაციებს ლიცენზია არ აქვთ.

” გიდასტურებთ, რომ ლიცენზია არ აქვთ და მუნიციპალიტეტში არც გამწმენდი ნაგებობებია მოწყობილი, ასევე არ არის საქლორატოროები. წყლის ხარისხის შემოწმებაზე, ყოველწლიურად, ტენდერი ცხადდება და გამარჯვებული ახორციელებს ამ მომსახურებას. ახლაც გამოცხდდა ტენდრი, როგორც ვიცი”- განმარტა ქსოვრელიშვილმა.

სახელმწიფო აუდიტის რეკომენდაციის შესაბამისად, თელავის მუნიციპალიტეტის მერიამ, საკრებულოსთან ერთად, სათანადო კონტროლის მექანიზმები დროულად უნდა დანერგოს, შეისწავლოს დარღვევების კონკრეტული ფაქტები და პასუხისმგებელი პირების მიმართ, შესაბამისი ღონისძიებები განახორციელოს

ავტორი,

ხათუნა გულიაშვილი