უკრაინის პორტები მარცვლეულის ექსპორტიორმა პირველმა გემმა შესაძლოა ორშაბათს დატოვოს
უკრაინის პორტები მარცვლეულის ექსპორტიორმა პირველმა გემმა შესაძლოა ორშაბათს დატოვოს. ამის შესახებ თურქეთის პრეზიდენტის, რეჯეფ თაიფ ერდოღანის პრესსპიკერმა იბრაჰიმ კალინმა თურქულ მედიას განუცხადა.
უკრაინის მარცვლეულით სავსე პირველი გემები სტამბულში მომდევნო კვირაში, სავარაუდოდ, 3 აგვისტოს ჩავა. ინფორმაციას CNN-ის თურქეთის ოფისი ავრცელებს.
მედიის ცნობით, 16 გემისგან შემდგარი ქარავნის უკრაინიდან სტამბულისკენ გადაადგილებას დრონების და სატელიტების საშუალებით დააკვირდებიან.
თურქეთი მუდმივად კონტაქტზეა უკრაინულ და რუსულ მხარესთან. როგორც კალინი ამბობს, ოდესის პორტიდან უკრაინული ხორბლით დატვირთული გემები გასასვლელად მზად არიან.
თურქეთში ჩასვლის შემდეგ კი უკრაინული მარცვლეული აფრიკის ქვეყნებში, კონკრეტულად კი სომალიში გაიგზავნება.
გაეროს თქმით, მარცვლეული საბოლოო დანიშნულების ადგილამდე სავარაუდოდ 1.5 თვეში ჩავა.
გემების მოძრაობის დერეფანს თურქეთში შექმნილი უკრაინის მარცვლეულის ექსპორტის კოორდინაციის ცენტრი აკონტროლებს. ამასთანავე სტამბული აცხადებს, რომ იმ შემთხვევაში თუ რომელიმე გემი სიგნალს გამორთავს და თურქეთს პორტის ოპერაციების შესახებ გამჭვირვალე ინფორმაციას არ მიაწვდის, მათ თურქეთის ტერიტორიულ წყლებში არ შეუშვებენ.
22 ივლისს სტამბულში უკრაინასა და რუსეთს შორის დაიდო შეეთანხმება, რომლის მიხედვითაც უკრაინის შავი ზღვის 3 პორტზე: ოდესაზე, ჩორნომორსკსა და “სამხრეთის” პორტებზე ბლოკადა მოიხსნებოდა და ქვეყანა მარცვლეულისა და სხვა აგრიკულტურული პროდუქტების ექსპორტს შეძლებდა. რუსეთმა კი პირობა დადო, რომ მიზანში არ ამოიღებდა პორტს, სანამ აქ მარცვლეულით დატვირთული გემები იმოძრავებდნენ.
ამ ხელშეკრულებას ხელი უკრაინის ინფრასტრუქტურის მინისტრმა, ოლექსანდრ კუბრაკოვმა და რუსეთის თავდაცვის მინისტრმა სერგეი შოიგუმ ხელი გაეროსა და თურქეთის შუამდგომლობით მოაწერეს.
23 ივლისს რუსულმა ძალებმა ოდესის პორტი დაბომბეს. უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინა მარცვლეულის ექსპორტს ოდესაზე თავდასხმის მიუხედავად დაიწყებს.
27 ივლისს უკრაინის საზღვაო შეიარაღებული ძალებმა გაავრცელა ინფორმაცია, რომ მარცვლეულის ექსპორტის შესახებ დადებული შეთანხმების შესაბამისად, უკრაინის შავი ზღვის სამმა პორტმა ფუნქციონირება განაახლა.
შეგახსენებთ, რუსეთი და უკრაინა მსოფლიოში ხორბლის ძირითადი მიმწოდებლები არიან, უკრაინული პორტებიდან ხორბლის ექსპორტის განახლება მას შემდეგ გახდა შესაძლებელი, რაც 22 ივლისს ამ საკითხზე თურქეთის და გაერო-ს შუამავლობით კიევსა და მოსკოვს შორის შეთანხმება შედგა რომელიც მიზნად ისახავს როგორც სასურსათო კრიზისის შემსუბუქებას, ასევე მარცვლეულის გლობალური ფასების შემცირებას, რომელიც რუსეთის უკრაინაში შეჭრის შემდეგ გაიზარდა.
თურქული მხარე ვარაუდობს, რომ უკრაინული ხორბლით დატვირთული პირველი გემი თურქეთში 3 აგვიტოს ჩავა.
