მნიშვნელოვანისიახლეები

იუსტიციის უმაღლესი საბჭოს წევრობის 2 ვაკანტურ თანამდებობაზე არავინ შეირჩა

პარლამენტმა იუსტიციის უმაღლეს საბჭოში არამოსამართლე წევრის 2 ვაკანტურ თანამდებობაზე არც ერთ კანდიდატს არ დაუჭირა მხარი. კენჭისყრის მეორე ტურში გადასული ოთხი კანდიდატიდან ვერც ერთმა საჭირო 90 ხმა ვერ მოიპოვა.

კენჭისყრის დაწყებამდე ქართული ოცნების თავმჯდომარემ, ირაკლი კობახიძემ ოპოზიციას კონსულტაციებისკენ მოუწოდა. ეს იმითაც არის განპირობებული, რომ ოპოზიციის ხმების გარეშე მმართველი გუნდი საბჭოში ვაკანტურ თანამდებობებს დამოუკიდებლად ვერ შეავსებს.

“ჩემი შემოთავაზება იქნებოდა, რომ დავიტოვოთ დრო კონსულტაციებისთვის, მანამდე გავიაროთ კონსულტაციები ამ ოთხი კანდიდატის გარშემო. დღეს ჩავატაროთ ერთგვარი ფორმალური კენჭისყრა. უმრავლესობის წევრების მიმართ ჩემი მოწოდება იქნება, რომ მხარი არ დაუჭიროთ არც ერთ კანდიდატს, ეს არის ფორმალური ჟესტი, დავიტოვოთ სივრცე იმისათვის რომ გაიმართოს კონსულტაციები”, – თქვა კობახიძემ.

დეპუტატი ნატო ჩხეიძე განმარტავს, რატომ დაუჭირა იუსტიციის უმაღლეს საბჭში ქართული ოცნების კანდიდატებს მხარი.

პარლამენტში გამართულ ბრიფინგზე მან თქვა, რომ ჩათში ოპოზიციისთვის მისაღები 4 კანდიდატის გვარის გარდა, კიდევ ერთი გვარი იყო – ნინო ნიშნიანიძის, რომელიც კენჭისყრის მეორე ტურში გადავიდა.
მისივე თქმით, ნაციონალურ მოძრაობას გუშინ გამართულ ბრიფინგზე ეს არ უთქვამს.

“ენმ-ის ბრიფინგის დროს, როდესაც მათ მეტი გულწრფელობის, დამაჯერებლობის თუ თვალსაჩინოების გულისთვის ჩათში ჩაწერილი მესიჯი ბრძანეს და თქვეს ასეთი ფრაზა, რომ იყო ოთხი გვარი: სალია, საჯაია, წიქარიშვილი და მუხაშავრია. თქვეს, რომ ჩათში ჩაგდებული იყო ეს ოთხი გვარი. მათ გამორჩათ ან დაივიწყეს, რომ იმ ჩათში იყო კიდევ მეხუთე გვარი – ნიშნიანიძე, მაგრამ ეს არ გამორჩათ და არ დაივიწყა ქართულმა ოცნებამ. საერთოდ არ არის ქართული ოცნება პირობის შემსრულებელი, მაგრამ ამ შემთხვევაში, როგორც ჩანს მოინდომეს რაღაც პირობის შესრულება და დაინტერესებული პირები ნახავთ, რომ იმ კანდიდატთა სიაში, რომლებიც მეორე ტურში უნდა გადავიდნენ, ერთ-ერთი არის სწორედ ნიშნიანიძე. როგორც ჩანს, სწორედ მოქმედებდა ის ფორმულა- 4/1-ზე, რომელიც მთლად ბოლომდე და ნათლად ოპოზიციური ჯგუფებისთვისაც არ იყო მთლად დამაჯერებელი თუ გაგებული და ამიტომ იყო, რომ სწორედ ოპოზიციური ჯგუფებიდან იყო ფრაზა, რომ აქ არის გარიგება. ეს გარიგება საბოლოო ჯამში, დაგვბრალდა ჩვენ : ჩხეიძეებს, მაჭუტაძეს და კიდევ ორ დეპუტატს. ენმ გადგა გვერდზე და აღშფოთებული სახეც მიიღო. მე ცხადია, პირადი კითხვები მექნება ჩემს კოლეგებთან, ენმ-ის ფრაქციის ზოგიერთ წევრთან”- ამბობს ჩხეიძე.

17 მაისს, პარლამენტში იუსტიციის უმაღლესი საბჭოში არამოსამართლე წევრის 5 ვაკანტურ თანამდებობაზე 3 ახალი წევრი აირჩიეს – ტრისტან ბენაშვილი (93 ხმა), გიორგი გზობავა (91 ხმა), ზურაბ გურასპაშვილი (93 ხმა). ამის შემდეგ ოპოზიციამ დარბაზი დატოვა და კენჭისყრა შეწყდა.

კანდიდატების მხარდაჭერილი ხმების რაოდენობა გახდა რამდენიმე ოპოზიციონერი დეპუტატის უკმაყოფილების მიზეზი – 5-მა ოპოზიციონერმა დეპუტატმა ქართული ოცნების კანდიდატებს დაუჭირა მხარი. დეპუტატები ამბობდნენ, რომ ზოგიერთი ოპოზიციონერი მმართველ გუნდს გაურიგდა.

კენჭისყრა ფარული იყო, თუმცა მოგვიანებით გავრცელდა ინფორმაცია, რომ ეს დეპუტატები არიან: ნატო და როსტომ ჩხეიძეები, ბაჩუკი ქარდავა, ნიკა მაჭუტაძე და დილარ ხაბულიანი. იმავე დღეს ჩხეიძეებმა და მაჭუტაძემ ენმ-ს ფრაქცია დატოვეს.

ოპოზიციის მიერ პლენარულ სხდომათა დარბაზის დატოვების შემდეგ იუსტიციის უმაღლესი საბჭოს წევრობის დარჩენილ 2 ვაკანტურ თანამდებობაზე არავინ შეირჩა. კენჭისყრის მეორე ტურში ოთხი კანდიდატი გადავიდა: რუსუდან კვინიკაძე, გოგა კიკალაშვილი, ლევან ნემსაძე და ნინო ნიშნიანიძე.

იუსტიციის უმაღლეს საბჭოში პარლამენტის კვოტით ასარჩევ ორ კანდიდატთან დაკავშირებით გადაწყვეტილების მიღების პროცესი ორი კვირით გადაიდო.
მესამე ტური 30 მაისს გაიმართება.

მსგავსი პოსტები

Back to top button