უკრაინელებმა 5 მიმართულებით მტრის 60-ზე მეტი შეტევა მოიგერიეს

უკრაინის შეიარაღებული ძალების გენერალური შტაბის ცნობით, ბოლო ერთ დღეში უკრაინელებმა 5 მიმართულებით მტრის 60-ზე მეტი შეტევა მოიგერიეს.

“რუსეთის ფედერაცია თავის ძირითად ძალისხმევას მიმართავს შეტევითი ოპერაციების ჩატარებაზე კუპიანსკის, ლიმანის, ბახმუტის, ავდეევკას და შახტერსკის მიმართულებებზე. გასული დღის განმავლობაში, ჩვენმა ჯარისკაცებმა ამ 5 მიმართულებით 60-ზე მეტი მტრის შეტევა მოიგერიეს”, – ნათქვამია განცხადებაში.

გენერალური შტაბის ინფორმაციით, რუსულმა ძალებმა 8 სარაკეტო და 32 საჰაერო დარტყმა განახორციელეს, მრავალჯერადი სარაკეტო სისტემებიდან კი 85. ამასთან, გენშტაბი აღნიშნავს, რომ უკრაინის მასშტაბით მტრის საჰაერო და სარაკეტო დარტყმების საფრთხე რჩება.

უკრაინის შეიარაღებული ძალების გენერალური შტაბი რუსი ოკუპანტების სამხედრო დანაკარგის შესახებ განახლებულ ინფორმაციას ავრცელებს. მონაცემები მოიცავს 24 თებერვლიდან 28 თებერვლამდე პერიოდს.

გენშტაბის ცნობით, ოკუპანტების სამხედრო დანაკარგი ასეთია:​

ჯარისკაცი – დაახლოებით 149 240
​ტანკი -3 388
ჯავშანტექნიკა – 6 630
საარტილერიო სისტემა – 2 383
სარაკეტო სისტემა – 478
საზენიტო საბრძოლო სისტემა – 247
თვითმფრინავები – 300
ვერტმფრენი – 288
ოპერატიულ-ტაქტიკური უპილოტო საფრენი აპარატი – 2 051
საკრუიზო რაკეტები – 873
საავტომობილო ტექნიკა და საწვავის ავზები – 5 252
გემი/ნავი/კატარღა – 18
​ სპეციალური აღჭურვილობა – 230.