მთავრობის 28 მილიონიანი თანადაფინანსება პოპ-ვარსკვლავების კონცერტებისთვის
პროექტ check in Georgia-ს ფარგლებში, საქართველოში ჯგუფი “Maroon 5”, რობი უილიამსი, ეროს რამაზოტი და ხოსე კარერასი ჩამოვლენ.
რადიო თბილისის ინფორმაციით, მთავრობის სარეზერვო ფონდიდან ამ პროგრამის წარმატებულად განხორციელებისთვის თანადაფინანსების სახით 28 მილიონი ლარი გამოიყო.
როგროც საქართველოს კულტურის სამინისტროში აცხადებენ, Check in Georgia მასშტაბური კულტურული ღონისძიებების სერიაა, რომელიც თბილისსა და რეგიონებში გაიმართება.
კულტურის სამინისტროს ცნობით, პროექტი ტრადიციულ ხასიათს მიიღებს და პროგრამა ყოველწლიურად კიდევ უფრო მრავალფეროვანი გახდება. Check in Georgia-ს ორგანიზებას კულტურის განვითარების საინვესტიციო ფონდი გაუწევს.
ამ დრომდე უცნობია რა ეღირება რობი უილიამსის კონცერტზე დასასწრები ბილეთი 27 მაისს, თუმცა tkt.ge – უკვე აცნობა მის ფანებს, რომ ბილეთების გაყიდვა მათი საიტიდან 15 აპრილს დაიწყება.
რობი უილიამსმა თავის ოფიციალურ გვერდზე ვიდეომიმართვაც გაავრცელა.
უკვე ცნობილია კიდევ ერთი პოპულარული მომღერლის ეროს რამაზოტის კონცერტის თარიღი, ადგილი და ბილეთის ფასიც.
როგორც რადიო თბილისისთვის გახდა ცნობილი, იტალიელი მომღერლის კონცერტი დედაქალაქში, სპორტის სასახლეში, 24 აპრილსს, 18 საათზე დაიწყება და ბილეთის ფასი 20 დან 90 ლარია.
„არასდროს მიმღერია საქართველოში! სიამოვნებით წარმოვადგენთ გრანდიოზულ შოუს დედაქალაქში და მაქსიმუმს გავაკეთებთ, რომ მსმენელმა ისიამოვნოს. იმედი მაქვს, ეს არ იქნება პირველი და უკანასკნელი კონცერტი თბილისში”.-აცხადებს რამაზოტი, რომლის კონცერტის ბილეთების გაყიდვა უკვე დაწყებულია.
მსოფლიოში აღიარებული ტენორი ხოსე კარერასი კი სასცენო მოღვაწეობას ამთავრებს და მსმენელს ქუთაისიდან დაემშვიდობება. კარერასი ქუთაისში კონცერტს 18 ივნისს გამართავს.კონცერტი ცენტრალურ მოედანზეა დაგეგმილი.
კარერასი კონცერტს ვახტანგ კახიძის თბილისის სიმფონიური ორკესტრის თანხლებით გამართავს.
