მნიშვნელოვანისიახლეები

აქციის მონაწილეების ნაწილი „ქართული ოცნების“ ოფისთან გადაინაცვლებს

პარლამენტთან მიმდინარე აქციის „შინ ევროპისკენ“ მონაწილეთა ნაწილი „ქართული ოცნების“ ოფისთან გადაინაცვლებს. ამის შესახებ შეკრებილებს მოძრაობა „შინ ევროპისკენ“ ერთ-ერთმა ლიდერმა გიორგი მშვენიერაძემ მოუწოდა.

მისი თქმით, თუ ხელისუფლება უკან არ დაიხევს, „ბევრი ასეთი კერა გაჩნდება“.

„3 ათასი ადამიანი გვჭირდება, რომელიც მზად იქნება, მივიდეთ პირველ სიმბოლოსთან – ეს არის „ქართული ოცნების“ ოფისი. აქედან წავა 3 ათასი ადამიანი, არც მეტი არც ნაკლები. წინ მე წავალ და 3 ათასი ადამიანი ვდგებით „ქართული ოცნების“ ოფისთან. დანარჩენები ვრჩებით აქ. იქნება პირველი დამოუკიდებელი კერა, სადაც იქნება არაძალადობრივი, მაგრამ მკაცრი აქცია. თუ ხელისუფლება მომდევნო წუთების განმავლობაში არ გადადგამს ნაბიჯებს უკან, ბევრი ასეთი კერა გაჩნდება. მე რომ აქ აღარ ვიქნები, დანარჩენს ჩემი თანამებრძოლები გეტყვიან. ჩვენი იქ მისვლა უნდა იყოს არაძალადობრივი. ძალადობა აწყობს ხელისუფლებას“,- განაცხადა გიორგი მშვენიერაძემ.

ამასთან აქციის მონაწილეების ნაწილი ხვალ დილით მთავრობის ადმინისტრაციის ოფისთან გადაინაცვლებს და მჯდომარე, მშვიდობიან აქციას გამართავს, ამის შესახებ ერთ-ერთმა ორგანიზატორმა, შოთა დიღმელაშვილმა განაცხადა.

“დილით ჩვენ ყველანი წავალთ ძალიან მშვიდობიანად, შემოვევლებით “ქაჯეთის ციხეს”, მჯდომარე პროტესტით მშვიდობიანად დავხვდებით მთავრობას, ღარიბაშვილს და შევასმენთ ჩვენს ხმას, რადგან აქედან არ ესმით.

ეს არის ჩვენი არაძალადობრივი, მშვიდობიანი გამოხატვა, ეს საღამო შეგვიძლია გამოვიყენოთ ერთმანეთთან სასაუბროდ, მივალთ დილით და ავუხსნით, რაც აქედან ვერ ავუხსენით,” – განაცხადა დიღმელაშვილმა.

მსგავსი პოსტები

Back to top button