კახეთში კორონავირუსით ინფიცირებული ბავშვების რიცხვი იზრდება

კორონავირუსით, კახეთში კიდევ ორი ჩვილი დაინფიცირდა. დაავადებათა კონტროლის ცენტრის კახეთის განყოფილების ინფორმაციით, ორივე მათგანი ერთ წლამდე ასაკისაა.

“26 ნოემბრის, 21 საათისათვის გამოვლენილი 169 ახალი შემთხვევიდან, ორი ერთ წლამდე ასაკის ჩვილია. მათი მკურნალობა რეგიონში ვერ მოხდება, სიმპტომების მიხედვით, ისინი თბილისში, ბავშვთა სპეციალიზებულ კლინიკაში გადაყვანას ექვემდებარებიან” – განაცხადა რადიო ჰერეთთან, ცენტრის ხელმძღვანელმა, ნელი ხიზანიშვილმა.

სექტემბრიდან დღემდე, კოვიდ- 19- ით, კახეთში, ხუთასამდე ბავშვი დაინფიცირდა, რაც საერთო რაოდენობის 15- 18%-ს შეადგენს.

ბოლო მონაცემებით, რეგიონში, 3148 კორონა ვირუსით ინფიცირებული მოქალაქეა. აქედან, ახმეტა-203, გურჯაანი-618, დედოფლისწყარო -280, თელავი -903, ლაგოდეხი – 386, საგარეჯო -303, სიღნაღი-196, ყვარელი -259.

ამ ეტაპზე მკურნალობას გადის 1 757, მათ შორის 1 565 დატოვებულია ბინაზე, 32 იმყოფება კოვიდ სასტუმროში, 160 კი, კოვიდ კლინიკაში.

რეგიონში გამოჯანმრთელდა 1 368 და გარდაიცვალა 23 მოქალაქე.