,,პირდაპირ და კატეგორიულად გეუბნებით უნდა გადაიხედოს საქართველო-ამერიკის ურთიერთობები,,-მდინარაძე

პირდაპირ და კატეგორიულად გეუბნებით, რომ ჩვენც მოვუწოდებთ იმ ამერიკელ სენატორებს, რომლებიც ასე აყენებენ საკითხს, რომ დიახ, უნდა უნდა გადაიხედოს საქართველო-ამერიკის ურთიერთობები: უნდა გაიხსნას ვიზა, თავისუფალი უნდა იყოს გადაადგილება – პარტნიორებსა და მეგობრებს შორის ეს არის სწორი დამოკიდებულება, – ამის შესახებ “ქართული ოცნების” აღმასრულებელმა მდივანმა, მამუკა მდინარაძემ 14 ამერიკელი სენატორის იმ წერილის საპასუხოდ განაცხადა, სადაც აღნიშნულია, რომ თუ “გამჭვირვალობის კანონპროექტი” მიღებული იქნება, სენატორები იძულებული იქნებიან, წაახალისონ აშშ-ის პოლიტიკის შეცვლა საქართველოს მიმართ.

მამუკა მდინარაძის განცხადებით, საქართველო და აშშ სტრატეგიული პარტნიორები არიან და საქართველოს მეგობრულ დამოკიდებულებას აშშ-დანაც შესატყვისი დამოკიდებულება სჭირდება. შესაბამისად, მისი თქმით, საქართველოს მოქალაქეებს თავისუფლად უნდა შეეძლოთ აშშ-ში გამგზავრება, უნდა გაფორმდეს თავისუფალი ვაჭრობის შეთანხმება და მეტი ინვესტიცია შემოვიდეს, წინააღმდეგ შემთხვევაში, მდინარაძისთვის გაუგებარია, რას უნდა გადახედონ სენატორებმა.
მდინარაძის თქმით, ასევე უნდა გადაიხედოს, სად მიდის ამერიკელი გადასახადის გადამხდელთა ფული საქართველოში.

„დიახ, საქართველო-ამერიკის ურთიერთობები უნდა გადაიხედოს. თქვენ რასაც მუშაობას ეძახით, ამ ხვეწნას ჩვენ არ ვაპირებთ. ჩვენც მოვუწოდებთ ამერიკელ სენატორებს, რომლებიც ასე აყენებენ საკითხს, რომ დიახ, საქართველო-ამერიკის ურთიერთობები უნდა გადაიხედოს. უნდა გაიხსნას ვიზა, გადაადგილება უნდა იყოს თავისუფალი – პარტნიორებსა და მეგობრებს შორის ეს არის სწორი დამოკიდებულება. ვიზალიბერალიზაცია და თავისუფალი ვაჭრობა, რომელიც არ არის დღეს, უნდა გაიხსნას და თუ ვართ მეგობრები, მეგობრობა მხოლოდ სიტყვით – არა. უნდა გაიზარდოს ინვესტიციები, თუ ჩვენ ვართ სტრატეგიული პარტნიორები საქართველოს მოქალაქეები თავისუფლად უნდა გადაადგილდებოდნენ აშშ-ში, თავისუფალი ვაჭრობა და პირდაპირი ფრენები უნდა გვქონდეს.

ამდენი წელია სტრატეგიულ პარტნიორობაზეა ხელი მოწერილი, 10 წელზე მეტია გასული და პირდაპირი ფრენები არ გვაქვს – დიახ, უნდა გადაიხედოს.

რა უნდა გადაიხედოს? – თავისუფალი ვაჭრობა? თავისუფალი საჰაერო მიმოსვლა თუ რა? და ამერიკელი ხალხის ფული საქართველოში სად მიდის ესეც უნდა გადაიხედოს და გამჭვირვალობის კანონი უზრუნველყოფს ამას. ჩვენზე რაც არის დამოკიდებული ამას გადავხედავთ, გამჭვირვალობის კანონს მივიღებთ და ამერიკელი გადამხდელის ფული სად მიდის საქართველოში, ყველაფერი გეცოდინებათ“, – აღნიშნა მდინარაძემ.

მამუკა მდინარაძემ ასევე ისაუბრა სანქციებზე, რა დროსაც მან აღნიშნა, რომ მსოფლიოში პირველი პრეცედენტი იქნება კანონის ინიცირებისა და მხარდაჭერისათვის ადამიანის დასანქცირება და “სიამოვნებით დაელოდება”, რა სანქციას დაადებენ.

„მსოფლიოში პირველი პრეცედენტი იქნება კანონის ინიცირებისა და მხარდაჭერისათვის, რომ დაასანქცირებენ ადამიანს. დიდი სიამოვნებით დაველოდები, რა სანქციას დამადებენ ამ სანქციას დამადებენ ამასთან დაკავშირებით, რომ მსოფლიოში პირველი პრეცედენტი იყოს, რომ კანონმდებელი კანონის ინიცირებისთვის დაასანქცირეს“, – აღნიშნა მამუკა მდინარაძემ.

ცნობისთვის, ამერიკის შეერთებული შტატების სენატის ორპარტიულმა ჯგუფმა საქართველოს პრემიერ-მინისტრს 26 აპრილს წერილი გაუგზავნა, რომელიც ღრმა შეშფოთებას გამოხატავს და პრემიერს აფრთხილებს, რომ თუ ხელახლა ინიცირებული უცხოური აგენტების კანონპროექტი კანონი გახდება, ისინი იძულებულნი იქნებიან წაახალისონ აშშ-ის პოლიტიკის შეცვლა საქართველოს მიმართ.

“ამერიკის ხმის“ ქართული რედაქციის ინფორმაციით, 14 სენატორის მიერ ირაკლი კობახიძისთვის გაგზავნილი შეშფოთების უპრეცედენტო ნოტა სენატის მიერ დაფიქსირებულ სხვა განცხადებებს შორის ყველაზე მკაცრია“. ამავე ცნობებით, სენატორების განცხადებით, თუ კანონპროექტი მიღებული იქნება, „იძულებული გავხდებით, წავახალისოთ აშშ-ის პოლიტიკის შეცვლა საქართველოს მიმართ, რაშიც შეიძლება შედიოდეს ინდივიდუალური სანქციები, ფინანსური დახმარების გადახედვა და სავიზო აკრძალვის გაფართოება“.

აშშ-ის კონგრესის ზედა პალატის, სენატის 14 წევრის ერთობლივ წერილში, რომელიც საქართველოს პრემიერ-მინისტრს, ირაკლი კობახიძეს გაუგზავნეს, ნათქვამია: „კანონპროექტი თუ იქნება მიღებული, იძულებული ვიქნებით, წავახალისოთ აშშ-ის პოლიტიკის ცვლილება საქართველოს მიმართ“.

ოცნება სენატორების წერილს “გაუგებრობა”-ს უწოდებს