რუსეთმა კიდევ ერთხელ მიიტანა იერიში მშვიდობიან მოქალაქეებზე-ბორელი
ევროკავშირის უმაღლესი წარმომადგენელი, ჯოზეფ ბორელი დონეცკის ოლქის ქალაქ კოსტიანტინივკაში სუპერმარკეტზე თავდასხმას ეხმიანება და წერს, რომ რუსეთმა კიდევ ერთხელ მიიტანა იერიში მშვიდობიან მოქალაქეებზე და ამის გამო მათ პასუხისმგებლობა უნდა დაეკისროთ.
“რუსეთმა კვლავ დაარტყა უკრაინელ მშვიდობიან მოქალაქეებს, თავს დაესხა დონეცკის რეგიონში, კოსტიანტინივკაში მდებარე დატვირთულ სავაჭრო ცენტრს. ჩვენ მხარს ვუჭერთ ამ და სხვა ომის დანაშაულებზე რუსეთის პასუხისმგებლობას. უკრაინას ახლა მეტი სამხედრო მხარდაჭერა სჭირდება, რათა დაიცვას თავისი ქალაქები, მშვიდობიანი მოსახლეობა და ინფრასტრუქტურა,” – წერს ბორელი.
შეგახსენებთ, რომ რუსეთმა 9 აგვისტოს, უკრაინაში, დონეცკის ოლქის ქალაქ კოსტიანტინივკაში სუპერმარკეტს დაარტყა. შედეგად დაიღუპა სულ მცირე 14 ადამიანი და დაშავდა 40-ზე მეტი. \
დონეცკის ოლქის ქალაქ კონსტანტინოვკაში, სუპერმარკეტზე რუსეთის თავდასხმის შედეგად დაღუპულთა რაოდენობა 14-მდე გაიზარდა – ამის შესახებ რეგიონის სამხედრო ადმინისტრაციის ხელმძღვანელი საუბრობს და ამბობს, რომ 43-მდე გაიზარდა დაშავებულთა რაოდენობაც.
მისივე ინფორმაციით, დაღუპულებს შორის სამი ბავშვია, ერთ-ერთი დაშავებულის მდგომარეობა კი მძიმეა.
მანამდე მან გაავრცელა ინფორმაცია, რომ რუსეთის თავდასხმამ ასევე დააზიანა 4 სახლი, 9 მაღაზია, ავტოსამრეცხაო და 12 მანქანა.
“კოსტიანტინივკაში სუპერმარკეტზე თავდასხმა რუსული ტერორის კიდევ ერთი შემთხვევაა. მშვიდობიანი მოსახლეობის წინააღმდეგ ომი არის ყველაფერი, რაც მათ შეუძლიათ” – განაცხადა პრეზიდენტის ოფისის უფროსმა ანდრეი ერმაკმა.
ვადიმ ფილაშკინის ცნობით, დაღუპულებს შორის სამი ბავშვია და ერთ-ერთი დაჭრილის მდგომარეობა მძიმეა. მანამდე ფილაშკინი აცხადებდა, რომ თავდასხმისას გამოყენებული იყო Kh-38-ის ტიპის რაკეტა.
“ეს არის კიდევ ერთი მიზანმიმართული დარტყმა ხალხის თავშეყრის ადგილას, რუსების მიერ განხორციელებული ტერორის კიდევ ერთი აქტი”, – წერდა ფილაშკინი ტელეგრამით.
უკრაინის პრეზიდენტის, ვოლოდიმირ ზელენსკის შეფასებით, ეს შეტევა უდრიდა ტერორისტულ თავდასხმას.
“რუსმა ტერორისტებმა დარტყმა განახორციელეს ჩვეულებრივ სუპერმარკეტსა და ფოსტის ოფისზე. ადამიანები ნანგრევებში არიან მოყოლილნი. მიმდინარეობს სამაშველო ოპერაცია და ყველაფერი გაკეთდება მათ გადასარჩენად”, – წერს ზელენსკი პლატფორმა X-ზე.
