საკონსტიტუციო ცვლილებების საყოველთაო სახალხო განხილვა იწყება
დღეიდან საკონსტიტუციო ცვლილებების საყოველთაო სახალხო განხილვა იწყება. პირველი შეხვედრა ქუთაისში გაიმართება. საორგანიზაციო კომისიის გასვლითი სხდომები 11 დღის განმავლობაში სხვადასხვა დიდ ქალაქში ჩატარდება.
საპარლამენტო უმრავლესობის ინფორმაციით, მოსახლეობასთან შეხვედრები 15 მაისს, თბილისში დასრულდება. მაისის ბოლოს კი, საკონსტიტუციო ცვლილებების პროექტზე მსჯელობა უკვე პარლამენტში განახლდება. მმართველ გუნდში საყოველთაო განხილვების დაწყებას პროცესის მნიშვნელოვან ნაწილს უწოდებენ.
კონსტიტუციაში შესატანი ცვლილებების საყოველთაო განხილვებში ჩაერთვება ევროპული საქართველო. პარტიის ლიდერების თქმით, ისინი შეხვედრებზე საპარლამენტო უმრავლესობის მიერ შემუშავებული კონსტიტუციური პროექტის ხარვეზებზეც გეგმავენ საუბარს.
პროცესს ყალბს უწოდებს ნაციონალური მოძრაობა. ოპოზიციური პარტიის ლიდერები განხილვებში მონაწილეობას არ მიიღებენ. როგორც პარტიაში განმარტავენ, მოსახლეობასთან მათი შეხვედრები პარალელურ რეჟიმში გაიმართება.
