ოკუპანტებმა კახოვკის ჰიდროელექტროსადგური ააფეთქეს იგი აღდგენას აღარ ექვემდებარება
უკრაინის ხერსონის ოლქის სამხედრო ადმინისტრაციამ დღეს დილით განაცხადა, რომ რუსეთის საოკუპაციო ძალების წარმომადგენლებმა ააფეთქეს ქალაქ კახოვკასთან მდებარე ჰიდროელექტროსადგურის კაშხალი.
ადმინისტრაციის ტელეგრამ-არხზე დილის 8 საათისთვის გამოქვეყნებული ინფორმაციით, ხერსონის ოლქის პოლიციასა და საგანგებო სიტუაციების სამსახურში განგაში გამოცხადდა და მათ დაევალა მდინარე დნეპრის მარჯვენა ნაპირზე, პოტენციური დატბორვის ზონაში მდებარე დასახლებული პუნქტებიდან მოქალაქეების ევაკუაცია. ამ ზონაში შედის 10 სოფელი და ქალაქ ხერსონის ნაწილი.
ხერსონის ოლქის ქალაქი კახოვკა მდებარეობს მდინარე დნეპრის მარცხენა ნაპირზე, რომელიც ამჟამად რუსეთის მიერაა ოკუპირებული. დნეპრის მარჯვენა ნაპირი, მათ შორის ქალაქი ხერსონი, უკრაინის ხელისუფლების კონტროლქვეშაა.
ხერსონის საოლქო-სამხედრო ადმინისტრაცია მოქალაქეებს აფრთხილებს, რომ წყლის დონე იმატებს, ამიტომ რისკის ზონაში მცხოვრებნი პოლიციელების და მაშველების ინსტრუქციებს უნდა დაემორჩილონ და ამასთან, არ ენდონ საოკუპაციო ძალების მიერ, დანაშაულზე პასუხისმგებლობის არიდების მიზნით გავრცელებულ დეზინფორმაციას.
კრემლის მიერ კონტროლირებული სააგენტო „ტასი“ ხერსონის ოკუპირებული ნაწილის დე ფაქტო ადმინისტრაციის წარმომადგენელზე დაყრდნობით წერს, რომ კაშხლის ერთი საყრდენი დაზიანების გამო ჩამოინგრა და ტერიტორიის დატბორვა დაიწყო. სააგენტოს წყაროს თანახმად, ღამით სიმშვიდე იყო და შეტევა არ ყოფილა.
კახოვკას ჰიდროელექტროსადგური მთლიანად განადგურებულია და აღდგენას არ ექვემდებარება. ამის შესახებ სახელმწიფო ჰიდროენერგეტიკული კომპანია უკრჰიდროენერგოს პრესსამსახურში განაცხადეს.
“6 ივნისის დილის მდგომარეობით კახოვკას წყალსაცავში წყლის დონე სწრაფად იკლებს, დაწყებულია მოსახლეობის ევაკუაცია პოტენციური წყალდიდობის ზონებიდან”, – ნათქვამია კომპანიის განცხადებაში.
ის, რომ კახოვკას ჰიდროელექტროსადგური აღდგენას არ ექვემდებარება დაადასტურა ქალაქ ნოვაია კახოვკას ოკუპანტმა ხელისუფლებამაც. რუსეთის მიერ დანიშნული ხელმძღვანელი ვლადმირი ლეონტიევი ამბობს, რომ სადგური თავიდან უნდა აშენდეს.
ამასთან ატომური ენერგიის საერთაშორისო სააგენტომ განაცხადა, რომ მისი ექსპერტები აკვირდებიან სიტუაციას და რომ არ არსებობს “ატომური უსაფრთხოების დაუყოვნებლივი რისკი” ზაპოროჟიეს ატომურ ელექტროსადგურზე კაშხლის განადგურების შემდეგ.
კახოვკის კაშხალი ხერსონის რეგიონში წყლით ამარაგებდა სამხრეთ-აღმოსავლეთ უკრაინის დიდ ნაწილს, მათ შორის ზაპოროჟიეს ატომურ ქარხანას, რომელიც მდებარეობს დინების ზემოთ და რუსეთის კონტროლის ქვეშაა.
უკრაინის ბირთვულმა სააგენტომ სამშაბათს განაცხადა, რომ კაშხლის განადგურებას შესაძლოა უარყოფითი შედეგები მოჰყვეს ატომურ ელექტროსადგურზე, მაგრამ სიტუაცია კონტროლს ექვემდებარება.
“ექსპერტების აზრით, ეს რა თქმა უნდა იმოქმედებს [ზაპოროჟიეს ატომური ელექტროსადგურის] მუშაობაზე. მაგრამ არ არის საჭირო ახლა სიტუაციის ესკალაცია და ყველაზე კრიტიკული დასკვნების გამოტანა. სიტუაცია ამჟამად კონტროლს ექვემდებარება”, – თქვა უკრაინის სამხრეთ სარდლობის წარმომადგენელმა ნატალია ჰუმენიუკმა.
უკრაინა რუსეთს ადანაშაულებს კაშხლის აფეთქებაში, ხოლო რუსეთის მიერ დაყენებულმა მაღალჩინოსანმა განაცხადა, რომ მისი განადგურება იყო “სერიოზული ტერორისტული თავდასხმა
დღეს რუსებმა უკრაინაში, ხერსონის ოლქში კახოვსკას ჰიდროელექტროსადგური ააფეთქეს. სადგურის განადგურებაში რუსეთი უკრაინას ადანაშაულებს.
ხერსონის საოლქო-სამხედრო ადმინისტრაციის ხელმძღვანელის ალექსანდრ პროკუდინის თქმით, “ახლა ზუსტდება ნგრევის მასშტაბები, წყლის სიჩქარე და მოცულობა, დატბორვის სავარაუდო ადგილები”.
მისივე თქმით, სახიფათო ტერიტორიებიდან მოსახლეობის ევაკუაცია მიმდინარეობს. პროკუდინმა, ასევე, აღნიშნა, რომ წყალი კრიტიკულ დონეს 5 საათში მიაღწევს.
