უკრაინის მინისტრთა კაბინეტმა დღეს თავდაცვის მინისტრის ყველა მოადგილე და სამინისტროს სახელმწიფო მდივანი თანამდებობიდან გაათავისუფლა

Українська правда-ს ცნობით, უკრაინის მინისტრთა კაბინეტმა დღეს თავდაცვის მინისტრის ყველა მოადგილე და სამინისტროს სახელმწიფო მდივანი თანამდებობიდან გაათავისუფლა. ინფორმაციას მედია მინისტრ ოლეგ ნემჩინოვზე დაყრდნობით ავრცელებს.
უკრაინის მინისტრთა კაბინეტმა ყოფილი თავდაცვის მინისტრის, ოლექსი რეზნიკოვის მოადგილეები გაათავისუფლა. უკრაინული მედიის ინფორმაციით, გათავისუფლებულია მინისტრის 6 მოადგილე.
უკრაინის კანონმდებლობის თანახმად, მინისტრის გადაყენების შემთხვევაში, მისი მოადგილეების პისტიდან გათავისუფლების უფლებამოსილება მინისტრთა კაბინეტს აქვს.
გათავისუფლდნენ:
ვოლოდიმირ გავრილოვი – უკრაინის თავდაცვის მინისტრის მოადგილის პოსტიდან;
როსტისლავ ზამლინსკი – უკრაინის თავდაცვის მინისტრის მოადგილის თანამდებობიდან;
ანა მალიარი – უკრაინის თავდაცვის მინისტრის მოადგილის პოსტიდან;
დენის შარაპოვი – უკრაინის თავდაცვის მინისტრის მოადგილის თანამდებობიდან;
ანდრეი შევჩენკო – ეკავა უკრაინის თავდაცვის მინისტრის მოადგილის პოსტი ევროპასთან ინტეგრაციის საკითხებში;
ვიტალი დეინეგა – უკრაინის თავდაცვის მინისტრის მოადგილის პოსტიდან ციფრული განვითარების, ციფრული ტრანსფორმაციებისა და დიგიტალიზაციის საკითხებში;
კონსტანტინე ვაშჩენკო – უკრაინის თავდაცვის სამინისტროს სახელმწიფო მდივნის თანამდებობიდან.
როგორც უკრაინული მედია წერს, გათავისუფლების შესახებ განცხადება ყველა მათგანმა თავდაცვის ახალი მინისტრის მოთხოვნის შემდეგ ნებაყოფლობით დაწერა. სამინისტროსთან დაახლოებული წყარო გამოცემასთან აღნიშნავს, რომ “სრული განახლება მიმდინარეობს” და ახალ მოადგილეებთან დაკავშირებით კონსულტაციები იმართება.
შეგახსენებთ, რომ 3 სექტემბერს, ზელენსკიმ ოლექსი რეზნიკოვი თავდაცვის მინისტრის პოსტიდან გადააყენა. მან განაცხადა, რომ “ახალი მიდგომების” დროა. 5 სექტემბერს უკრაინის რადამ თავდაცვის მინისტრ ალექსეი რეზნიკოვის თანამდებობიდან გათავისუფლებას დაუჭირა მხარი. მისი გათავისუფლების ინიციატივით უკრაინის პრეზიდენტი, ვოლოდიმირ ზელენსკი, გამოვიდა. თავდაცვის სამინისტროს ახალ მინისტრად კი რუსტემ უმეროვი დაინიშნა რომელიც უკრაინის სახელმწიფო ქონების ფონდის ხელმძღვანელი იყო.
ოლექსი რეზნიკოვი თავდაცვის მინისტრის თანამდებობას უკრაინაში რუსეთის სრულმასშტაბიან შეჭრამდე იკავებდა.
5 სექტემბერს, უკრაინის რადამ რეზნიკოვი გათავისუფლებას მხარი 327 ხმით დაუჭირა.