ზვიადაურს განზრახ მკვლელობისთვის 7-15 წლამდე პატიმრობა ემუქრება
საქართველოს პარლამენტის ყოფილ წევრსა და ოლიმპიურ ჩემპიონს, ზურაბ ზვიადაურს ბრალი სისხლის სამართლის კოდექსის 108-ე მუხლით წარუდგინეს, რაც განზრახ მკვლელობას გულისხმობს. (თავისუფლების აღკვეთა 7-15 წლამდე გულისხმობს).
გამოძიება ზვიადაურს, წყალტუბოში მცხოვრები, 27 წლის ნიკა კენჭოშვილის მკვლელობას ედავება.
შინაგან საქმეთა სამინისტროს ვერსიით, 16 აგვისტოს, თელავის მუნიციპალიტეტის სოფელ წინანდალში, რამდენიმე პირს შორის დაწყებული ურთიერთშელაპარაკება ფიზიკურ დაპირისპირებაში გადაიზარდა, რასაც ორმხრივი სროლა მოჰყვა.
ახმეტის მკვიდრმა, ვასილ ცოცხალაშვილმა, იქვე მყოფი ჯაბა ჯანგირაშვილის კუთვნილი ცეცხლსასროლი იარაღიდან, ნიკა კენჭოშვილს ესროლა, რასაც საპასუხო სროლა მოჰყვა.
კენჭოშვილის მიერ განხორციელებული სროლის შედეგად, ვასილ ცოცხალაშვილი და ზვიად ზვიადაური ადგილზე დაიღუპნენ, გვერდით მყოფი, ზვიად მაისურაძე და ანზორ შამრელაშვილი კი დაიჭრნენ.
ბრალდების მტკიცებით, ზურაბ ზვიადაურმა, რომელიც ამ კონფლიქტში მონაწილეობდა, საკუთარ სახელზე რეგისტრირებული იარღით, სასიკვდილოდ დაჭრა ნიკა კენჭოშვილი.
პოლიციამ, ზურაბ ზვიადაური და ჯაბა ჯანგირაშვილი 17 აგვისტოს დააკავა. ზურაბ ზვიადაურს ბრალი სისხლის სამართლის კოდექსის 108-ე მუხლით, ხოლო ჯაბა ჯანგირაშვილს ბრალი სისხლის სამართლის კოდექსის 238-ე მუხლით წარუდგინეს.
გამოძიება ჯანგირაშვილს, ცეცხლსასროლი იარაღის დაუდევრად შენახვას ედავება.
პროკურატურა ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით, თელავის რაიონულ სასამართლოს დღესვე მიმართავს.ზვიადაურის ადვოკატები, წარდგენილ ბრალს არ ეთანხმებიან და ამბობენ, რომ ყოფილი დეპუტატი, აუცილებელი მოგერიების ფარგლებში მოქმედებდა. ამავე პოზიციაზეა, თავად ზვიადაურიც და ის ბრალს არ აღიარებს.
ბრალდებული ოლიმპიური ჩემპიონისათვის, აღკვეთის ღონისძიების შეფარდების საკითხი, სასამართლოში, სავარაუდოდ, ხვალ, 19 აგვისტოს განიხილება.
ზურაბ ზვიადაური 1981 წელს ახმეტაში დაიბადა. სკოლის შემდეგ, დაამთავრა საქართველოს სახელმწიფო ფიზიკური აღზრდისა და სპორტის აკადემია ძიუდოს მწვრთნელის კვალიფიკაციით 2005 წელს.
2010-2011წწ. საქართველოს ძიუდოს ეროვნული ნაკრების მთავარი მწვრთნელის თანაშემწე იყო. მსოფლიოს ჭაბუკთა თამაშების მეორე პრიზიორი (1998), მსოფლიოს ჩემპიონი ახალგაზრდებს შორის (2000), მსოფლიოს ჩემპიონატის მეორე პრიზიორი (2001), მსოფლიოს თასის გათამაშების მეორე პრიზიორი გუნდურ ჩათვლაში (2002), ევროპის ჩემპიონატის მესამე პრიზიორი პირად შეჯიბრებაში (2002), ევროპის ორგზის ჩემპიონი გუნდურ შეჯიბრებაში (2002, 2003), მსოფლიოს ჩემპიონატის ორგზის მეორე პრიზიორი (2002, 2003), ათენის XXXVIII ოლიმპიადის ოლიმპიური ჩემპიონი (2004);
2012-2016წწ. პოლიტკური კარიერა დაიწყო და საქართველოს მე-8 მოწვევის პარლამენტის წევრი გახდა, საარჩევნო ბლოკი: “ბიძინა ივანიშვილი – ქართული ოცნება”.
2018 – ბრწყინვალების საპრეზიდენტო ორდენი
2004 – ქართული სპორტის რაინდის წოდება და ღირსების ორდენი
